PDF
Litwanyň Seýminde (parlamentinde) bir hepde dowam eden gepleşiklerden soň, üç esasy syýasy güýç – Sosial-demokratik partiýa, «Litwanyň hatyra» demokratlar bileleşigi hem-de «Litwanyň daýhanlarynyň we ýaşyllarynyň bileleşigi» täze dolandyryjy koalisiýany döretmek baradaky ylalaşyga gol çekdiler. Ýurduň täze hökümetini 141 orunlyk parlamentde 75 mandata eýe bolan sosial-demokratlaryň lideri Mindaugas Sinkýawisýusyň ýolbaşçylyk etmegi meýilleşdirilýär. Öňki Premýer-ministr Inga Rugineneniň ýolbaşçylygyndaky hökümet bolsa geljek hepdede, ýagny 23-nji iýunda resmi taýdan wezipesinden çekiler.
Metbugat habaryna görä, täze koalisiýa gatnaşyjylaryň arasynda ministrlik orunlaryny paýlaşmak barada doly ylalaşyk gazanyldy. Şoňa laýyklykda, iň uly partiýa bolan sosial-demokratlar goranmak, daşary işler, maliýe we içeri işler ministrlikleri hem başga-da jemi 9 ministrligi özünde saklar. «Litwanyň hatyra» demokratlar bileleşigi saglygy goraýyş, oba hojalygy we energetika ministrliklerine ýolbaşçylyk eder. «Daýhanlaryň we ýaşyllarynyň bileleşigi» bolsa öz hyzmatdaşlary bilen bilelikde ykdysadyýet we adalat ministrliklerini gurnar. Ozalky koalisiýanyň dargamagyna sebäp bolan «Nemanyň şapagy» atly sagçy-populist partiýasy bolsa, sosial-demokratlaryň ses bermegi esasynda bu gezekki hyzmatdaşlygyň daşynda galdyryldy.
Täze gol çekilen koalisiýa ylalaşygynyň esasy ugurlary hökmünde ýurduň goranyş ukybyny we durmuş goraglylygyny güýçlendirmek bellenilip geçilýär. Resminamada howa goranyşyny pugtalandurmak, goranyş çykdajylaryny jemi içerki önümiň (JIÖ) 5 göterimine çenli ýokarlandyrmak we onuň Ýewropa Bileleşigine agza bolmagyna ýardam bermek göz öňünde tutulýar. Mundan başga-da, taraplar özara düşünişmezlikleri köpçülige aýan etmän, ýapyk görnüşde çözmegi hem-de Hytaý Halk Respublikasy bilen diplomatik gatnaşyklary Ýewropa Bileleşiginiň beýleki döwletleriniň derejesinde kadalaşdyrmagy maksat edinýärler.
