PDF
Nýu-Ýorkda BMG-niň Baş Assambleýasynyň 81-nji sessiýasynyň ýokary derejeli hepdeligi tamamlandy. 22-28-nji sentýabr aralygynda geçen bu forumda 193 ýurduň Baştutanlary, Hökümet ýolbaşçylary we beýleki wekiliýetler global meseleleri ara alyp maslahatlaşdylar.
Bu ýyl «Ynamy dikeltmek, özgertmeleri dolandyrmak: ähli taraplar üçin netijeli BMG» şygary astynda guralan çärede üýtgeýän howa şertleri, emeli aňyň geljegi, ösüş we deňsizlik ýaly wajyp global meseleler ara alnyp maslahatlaşyldy. Şeýle hem bu forum 10 ýyllyk möhleti tamamlanýan BMG-niň Baş sekretary Antoniu Guterrişiň soňky gezek gatnaşan Baş Assambleýasy bolup, ol çykyşynyň ahyrynda delegatlar tarapyndan köp minutlyk el çarpyşmalar bilen garşylandy.
Baş Assambleýanyň Başlygynyň metbugat sekretary Melissa Sammersiň habar bermegine görä, bu ýylky sessiýada Mýanma we Owganystandan başga ähli agza döwletler çykyş edip, olaryň arasyna 113 sany döwlet we hökümet Baştutany, şeýle hem ýokary derejeli wekiller gatnaşdy. Çykyş edenleriň 60 göterimi emeli aň meselesine degip geçdi, üçden biri bolsa howa üýtgeşmeleri baradaky aladalary beýan etdi. Şeýle hem hepdeligiň dowamynda BMG-niň Baş sekretary 147, Baş Assambleýanyň Başlygy bolsa 95 sany ikitaraplaýyn duşuşyk geçirdi.
Her ýyl sentýabr aýynda BMG-niň Nýu-Ýorkdaky baş edarasynda geçirilýän Baş Assambleýanyň mejlisi dünýä liderleriniň öz ýurtlarynyň ileri tutýan ugurlaryny beýan edýän we köptaraplaýyn duşuşyklary geçirýän iň iri diplomatik platformalaryň biri bolup durýar. Ýokary derejeli hepdeligiň çäginde dünýä jemgyýetçiliginiň ünsüni çeken bu möhüm ähmiýetli diplomatik çäre üçin wekiller tarapyndan takmynan 18 müň sany hereket edýän akkreditasiýa kartasynyň resmileşdirilendigi bellenildi. Bu bolsa çäräniň dünýä derejesindäki giň gerimini we ähmiýetini açyp görkezýär.
Bu giň gerimli forum halkara jemgyýetçiliginiň iň ýiti meseleleri çözmekde we özara ynanyşmagy pugtalandyrmakda esasy dialog meýdançasy bolup hyzmat edýändigini ýene bir gezek subut etdi.
