Ýurdumyzyň okuwçylardan ybarat topary robot tehnologiýasy boýunça Koreýa Respublikasynyň Inçhon şäherinde geçiriljek “FIRST Global Challenge 2026” atly halkara bäsleşigine gatnaşar. “Robotlaryň Olimpiadasy” diýlip hem atlandyrylýan bu iri bäsleşik 7-10-njy oktýabr aralygynda geçiriler. Oňa dünýäniň 190-dan gowrak döwletiniň ýaşlarynyň gatnaşmagyna garaşylýar.

Bu halkara bäsleşige gatnaşjak “OguzRobot” topary Aşgabat şäheriniň dil dersleri çuňlaşdyryp öwredýän ýöriteleşdirilen 97-nji orta mekdebiniň okuwçylary Suhan Nowbatow, Oraznyýaz Rejepow, Aznawur Çolukow, Arslan Babajyýew we Daýhan Gurbanow dagydan düzülen. Topar “Ýaş inžener 2026” bäsleşiginde tapawutlanan okuwçylardan seçilip alnyp, aprel aýyndan bäri “Kämil bilim” okuw merkeziniň “Erjeller” kompýuter bölüminde ýörite taýýarlyk gördi. Olara Arkadag şäheriniň 1-nji ýöriteleşdirilen okuw-terbiýeçilik toplumynyň informatika mugallymy Myrat Sähetgulyýew we Türkmenistanyň Oguz han adyndaky Inžener-tehnologiýalar uniwersitetiniň talyby Dawut Gurbanow tälim berdiler.

“FIRST Global Challenge” – Olimpiýa oýunlary görnüşinde guralýan robot tehnologiýasy boýunça halkara bäsleşik bolup durýar. Ol bu gezek tebigatda döreýän ýangynlara garşy göreşmekde innowasion çözgütlere («Igniting Innovation») bagyşlanýar.

Ýatlap geçsek, mekdep okuwçylarymyz geçen ýyl Panamada geçirilen bu abraýly halkara ýaryşda üstünlikli çykyş edip, «Skill Challenge» ugrundan birinji orna mynasyp bolupdy.

Okuwçylarymyza üstünlikler arzuw edýäris!

Gyzykly bolup bilerЕЩЕ ОТ АВТОРА