Haýwanat dünýäsinde her bir jandar özboluşly aýratynlygy bilen tapawutlanýar. Dünýäniň dürli ýerlerinde özboluşly jandarlar we ösümlikler bar. Gury ýerde ýaşaýan iň uzyn boýly jandar žiraf (“Giraffa camelopardalis”) hem täsin jandarlaryň biridir. Ol, esasan, seýrek agaçly we gyrymsy ösümlikli tropiki sähra zonalarynda ýaşaýar. Žiraflar hordalylar maşgalasyna degişli bolup, olaryň mekany Afrika we Saharanyň günortasydyr. Süýdemdirijiler toparyna degişli bolan bu jandarlaryň boýy käte 6 metrden gowrak bolup bilýär. Onuň boýny has uzyn bolýar. Kellesi göwresinden has ýokarda bolýan bu jandaryň uly ýüregi hem-de üýtgeşik ýürek-damar ulgamy bar. Ol ýürekden 3 metr aralykdaky beýnä ganyň bökdençsiz barmagyny üpjün edýär. Onuň gan basyşy beýleki haýwanlaryňkydan has ýokary bolýar. Muňa garamazdan, gan damary adamyňkydan hem inçe bolýar. Aşaky dişleriniň dilim-dilim 3 gyýakly bolmagy olaryň uly ýapraklary agaçlardan aňsatlyk bilen dişläp, goparmagyna ýardam edýär. Žiraflaryň dili 45 santimetre ýetýär. Adamlaryň barmak yzlarynyň birmeňzeş bolmaýşy ýaly, daşynyň nagşy birmeňzeş žiraf hem ýok. Olar süri bolup ýaşaýarlar. Her sürüde 7-10 žiraf bolýar. Käte olar birigip, 50-70 agzaly uly sürini hem emele getirýärler. Her topar 100 inedördül kilometr meýdany özüne mesgen edinýär. Olaryň tizligi sagatda 50 km-e çenli ýetýär. Ot bilen iýmitlenýän bu jandarlar ýyrtyjylaryň garşysyna mertlerçe çykyp bilýär. Goşatoýnakly bolan bu jandarlara sähra haýwanlary hem diýilýär. Olaryň görüş we eşidiş organlarynyň ýitiligi abanýan howplary wagtyndan öň duýmaga kömek edýär. Kiçijik gulakly bu jandarlaryň owadan gözleri, gür kirpikleri bolýar. Olar ýöränlerinde ilki sag aýaklaryny, soň çep aýaklaryny hereketlendirip, howlukman ýöreýärler. Günüň dowamynda 30 kilogram töweregi iýmit iýýän žiraflar wagtynyň 16-20 sagadyny iýmitlenmek bilen geçirýär. 1 hepdeläp suwsuzlyga çydamly bolan žiraflar bir gezekde 40 litre golaý suw içýär.
