Günüň dowamynda ýanymyzdan aýyrmaýan
el telefonlarymyzyň arassaçylygy
elimiziň arassaçylygy ýaly ähmiýetlidir.
Eýsem, el telefonlaryny nähili arassalamaly?
– Ilki bilen telefonyňyzy öçüriň, daşlygyny çykaryň! Eger-de yzky gapagy, batareýasy, sim karty we çipi çykýan bolsa, olary aýyryň!
– Enjama gaty jisimleri, çygly süpürgiç we spirtli suwuklyklary degirmäň. Bu serişdeler telefonyň reňkine we elektron shemalaryna zeper ýetirip biler.
– Arassalamak üçin elektron dükanlarda satylýan ýörite suwuklyklary we esgileri ulanyň. Bu suwuklyklary gönüden-göni enjamyň içine pürkmän, esgini çyglandyrmak arkaly ulanyň.
– Telefonyň deşiklerinden giren islendik suwuklyk oňa zeper ýetirip biler.
– Telefonyňyzyň yzky gapagyny we batareýasyny süpürmek üçin pamykly çöpjagazlar we ýumşajyk mata ulanyp bilersiňiz.
– Telefonyň kameralaryny ýörite esgi bilen ýuwaşja süpürilmegi maslahat berilýär.
– Içine hapa ýygnanan mikrofonyň we ses gataldyjynyň deşijekleri sesiň hilini peseldýär. Şol sebäpli olary arassalanyňyzda has ünsli bolmaly.
– Çygly mata bilen süpürilen enjamyň aýrylan böleklerini guraýança olary ýerine dakmaň!
– Tok bilen işleýän enjamlaryň ählisinde suwuklygyň degmegi, niýetlenilmedik tok akymyna ötürilmegi, talabalaýyk bolmadyk arassaçylyk, ýere gaçmagy ýa-da urgynyň degmegi olaryň ulanyş möhletini azaldyp bilýär. Haýsydyr bir haryt satyn alnanda bahasyna ýa-da öndürijisine däl-de, özüňize zerurdygy ýa-da däldigi göz öňünde tutulsa, alnan zady has uzak wagtlap ulanyp bolar. Arassaçylygy yzygiderli we bolmalysy ýaly ýerine ýetirmeli. Elektron enjamlaryny, ýagyş, sowuk, yssy, çyg ýaly daşky täsirlerden goramaly. Telefon, planşet, ýan kompýuter ýaly mobil enjamlar nahar iýilýän ýa-da çaý içilýän stoldan uzagrakda goýulmaly.
