Angliýanyň “Premier Ligasynyň” çempiony “Liwerpuldan” 2 oýunçy başga klublara transfer boldy. 2014-nji ýylda “Southemptondan” “Liwerpula” transfer bolan futbolçylar – horwatiýaly goragçy Deýan Lowren bilen angliýaly hüjümçi Adam Lallana 6 ýyldan soň, başga toparlar bilen şertnama baglaşdylar.
Toparyň esasy goragçylarynyň biri Deýan Lowren Russiýanyň “Zenit” toparyna geçdi. 31 ýaşly oýunçynyň transferi üçin rus kluby iňlis toparyna 12 million ýewro tölär. Horwatiýaly futbolçy täze topary bilen 3 ýyllyk şertnama baglaşdy. Ol “Liwerpuldan” ozal, “Southempton”, “Lion”, “Dinamo Zagreb” hem-de “Inter Zapresiç” toparlarynda oýnapdy.
Şeýle-de 32 ýaşyndaky Adam Lallana “Braýton end How Albion” topary bilen 3 ýyla niýetlenen şertnama gol çekişdi. Oýunçy täze klubuna tölegsiz geçdi. Lallana “Liwerpulda” 6 ýylyň dowamynda jemi 178 oýunda 22 gezek tapawutlandy.
