Ekrandaky şekilleri kämilleşdirmäge gönükdirilen mikro enjamlary öndürýän “Nvidia” kompaniýasy geçen hepde “RTX 3000” ekran kartlarynyň kämilleşdirilen görnüşlerini köpçülige ýetirdi. Tehnologiýa bilermenleri bu täzeligi soňky 20 ýylyň iň uly ösüşi hökmünde teswirledi. Täze ekran kartlaryndan soňra kompýuter bazary, “Nvidia”-nyň esasy bäsdeşi “AMD” kompaniýasynyň jogabyna garaşmaga başlady. “AMD” bu gyzyklanma adatdan daşary önüm bilen jogap berdi.
“Gamerant” saýtynyň ýekşenbe güni habar bermegine görä, kompaniýa mahabatlandyryş harytlaryny satýan saýtynda täze welosipedleri ýerleşdirdi. Kompaniýanyň janköýerlerine welosipediň iki görnüşi hödürlendi. Olardan birinjisi “AMD Custom Cruiser” atly ulag serişdesi bolup, bu welosiped adatça şäher merkezlerinde ulanylýanlara meňzeýär. Welosipedlerden ikinjisi bolsa, “AMD Custom Mountain Bike” diýlip atlandyryldy. Kompaniýanyň bu önümi “AMD Custom Cruiser”-a garanyňda has kämilleşdirilen welosiped görnüşi bolup, tizligini sazlamaga mümkinçilik berýär.
“AMD” kysymly welosipedler häzirlikçe diňe ABŞ-da elýeterlidir. Welosipedler janköýerler üçin niýetlenen saýtyň iň gymmat harydy bolmak bilen 299 ABŞ dollaryndan satylýar.
