Telewideniýe dünýäsiniň Oskary hasaplanýan “Emmy Primtime” baýraklarynyň 72-nji gowşurylyş dabarasy Los Anjelesdäki “Staples Center”-de geçirildi. Jimmi Kimmeliň alyp baran dabarasyna az sanly tomaşaçy, şol sanda baýraga mynasyp bolanlaryň köpüsi teleköpri arkaly gatnaşdy.
Dabarada “Schitt’s Creek” teleserialy iň gowy komediýa serialy diýlip saýlandy. “Pop TV” telekanalynda ýaýlyma berilýän bu komediýa jemi 7 ugurda “Emmy” heýkeljiklerini alyp, rekordyň eýesi boldy. Serialyň artistleri Katerina O’Hara komediýa seriallarynyň iň gowy aktrisasy, Ýujin Lewi iň gowy aktýor, Den Lewi ikinji plandaky iň gowy aktýor hem-de Enni Mörfi ikinji plandaky iň gowy aktrisa baýraklaryna laýyk görüldi.
HBO kanalynyň önümi bolan “Succession” (“Miras düşerler”) iň gowy drama serialy diýlen ugurda “Emmy” heýkeljigini eýeledi. Serial jemi 5 baýrak gazandy. Serialda baş keşbi janlandyrýan Jeremi Strong drama seriallarynyň iň gowy aktýory baýragy bilen sylaglandy. Ýaş aktrisa Zendaýa “Euphoria” serialyndaky keşbi üçin drama seriallarynyň iň gowy aktrisasy diýlip saýlandy. Mark Ruffalo (“I Know This Much Is True) bilen Rejina King (“Watchmen”) degişlilikde, gysga göwrümli seriallaryň ýa-da filmleriň (telefilmler) iň gowy aktýory we aktrisasy baýraklaryna laýyk görüldi. Billi Krudrup “(The Morning Show”) bilen Julia Garner (“Ozark”) bolsa drama serillarynyň ikinji plandaky iň gowy aktýory we aktrisasy diýlen ugurlarda tapawutlandy. “Watchmen” serialynyň gysga göwrümli iň gowy serial saýlanan dabarasynda “RuPaul’s Drag Race” iň gowy bäsleşik programmasy, şeýle-de, “Last Week Tonight with John Oliver” gepleşigi iň gowy “Variety Talk” efiri diýlip yglan edildi.
