German obýektiw öndürijisi “Zeiss” kompaniýasynyň täze “ZX1” fotoapparatynyň aýratynlyklary mälim boldy. Belli “B&H Photo” elektron söwda platformasynda öňünden sargamak isleýänlere 6 000 dollardan elýeter bolan täze fotoapparat barada ilkinji gezek iki ýyl mundan ozal agzalypdy.
“ZX1”-e 37 megapiksellik kesilmeýän, ýagny “full-frame” aňlatmasy bilen belli bolan sensor ýerleşdirilipdir. Bu sensor suraty ýokary hilde düşürmäge ukyplydyr. 35 millimetrlik obýektiwi bolan täze fotoapparat “Android” amaly ulgamy esasynda işleýär. “ZX1”-iň has tapawutly aýratynlygy bolsa, “Adobe Lightroom” programmasynyň ýüklenen bolmagydyr. “Adobe Lightroom” programmasy suratlary sanly ulgamda gaýtadan işlemäge mümkinçilik berýär. Bu programmanyň fotoapparatyň içinde gelmegi suratçylaryň işini aňsatlaşdyrar.
