Şu günler ýurdumyzyň ähli sebitlerinde “ak altynyň” bol hasylyny ýygnamak gyzgalaňly ýagdaýda dowam edýär. Ahal we Mary welaýatlarynyň käbir etraplarynyň pagta taýýarlamak boýunça şertnamalaýyn borçnamalaryny ýerine ýetirendikleri baradaky hasabatlary öňdebaryjylaryň zähmet depginleriniň ýokarydygyny äşgär edýär.
Ahal welaýatynyň Gökdepe etrabynyň pagtaçylay Watan harmanyna 12 müň 500 tonnadan gowrak, Ak bugdaý etrabynyň hasyl ussatlary 43 müň 250 tonnadan gowrak, Sarags etrabynyň pagtaçy kärendeçileri bolsa 35 müň 730 tonnadan gowrak pagta tabşyryp, şertnamalaýyn borçnamalaryny berjaý etdiler.
Mary welaýatynyň Tagtabazar etrabynyň pagtaçylary 16 müň 100 tonnadan gowrak, Ýolöten etrabynyň “ak altyn” ussatlary 31 müň 500 tonna, Türkmengala etrabynyň pagtaçy kärendeçileri 35 müň 500 tonna hasyl tabşyryp, pagta taýýarlamak baradaky meýilnamanyň ýerine ýetirilmegine mynasyp goşantlaryny goşdular.
Tamamlaýjy tapgyra gadam goýan hasyl ýygnamak işiniň depginlerini ýokarlandyrmak, hasyly kabul ediş bölümlerine bökdençisz daşamak we pagta arassalaýjy kärhanalarda hasyly gaýtadan işlemek boýunça zerur işler alnyp barylýar. Möwsümiň öňdebaryjylarynyň göreldesine eýerip, pagta ýygymynyň depginleri barha ýokarlanýar we möwsüme gatnaşyjylar bellenen sepgide üstünlikli ýetmek ugrunda öndürijilikli işlerini dowam edýärler.
