HABAR – SELJERME
«Atletik Bilbao» topary Ispaniýada 2019–2020 möwsümine degişli 3 uly kubogyň 2-sini eýelemegi başardy. Topar iki ýaryşyň finalynda — Ispaniýanyň Şa Kubogynyň hem-de Ispaniýanyň Naýbaşy Kubogy nyň jemleýji duşuşygynda «Barselonadan» üstün çykdy. «Atletik Bilbao» toparynyň iki sany özboluşly aýratynlygy bar. Olaryň birinjisi toparyň düzüminde diňe baskly (Uly Bask zolagy — Ispaniýanyň demirgazygy hem-de Fransiýanyň günortasy) futbolçylar oýnaýar. Topar bu ýörelgesini 110 ýyldan bäri dowam etdirip gelýär.
DIŇE BASKLYLAR ÇYKYŞ EDÝÄR
1898-nji ýylda esaslandyrylan klubda diňe basklylaryň oýnamagy ony özboluşly, täsin toparlaryň birine öwürýär. Her ýylda 2 gezek geçirilýän transfer möwsüminiň «Atletik Bilbao» üçin o diýen ähmiýe
ti ýok. Sebäbi olar başga toparlar ýaly islendik futbolçyny klubuň düzümine goşmaýarlar. Eýsem, bu ýörelgä näme sebäp bolduka? Topar 1911-nji ýylda oýnalan Şa Kubogy duşuşygynda «gabat gelmeýän daşary ýurtly futbolçy» oýnadandygy bilen baglanyşykly gürrüňler çykýar. Şondan soň klubuň şol wagtky ýolbaşçylary mundan beýläk toparda basklylardan başga hiç kimi oýnatmazlyk barada karar kabul edýärler. Elbetde muny resmi ýagdaýda ýazga geçirmeseler hem, alnan bu karar edil daşa ýazylan ýaly henize çenli bozulman gelýär. Biksent Lizerazu, Aýmerik Laporte ýaly fransiýaly basklylar hem «Atletik» toparynyň köýnekçesini geýdi.
AŞAKY LIGA DÜŞMEDIK ÜÇ TOPARYŇ BIRI
Toparyň ýene bir aýratynlygy-da «Real Madrid» hem-de «Barselona» bilen bir hatarda, «La Ligadan» aşaky liga düşmedik 3 klubuň biri bolmagydyr. Duşuşyklaryny Bilbao şäherindäki 53 müň 289 orunlyk «San Mames» stadionynda oýnaýan topar «La Ligada» 8 gezek çempionlyk gazandy. Soňky sapar 1983–84 möwsüminde çempion bolan klub Ispaniýanyň Şa Kubogyny «Barselonadan» (30) soň 23 kubok bilen iň köp eýelän topardyr.
LEZAMA FUTBOL AKADEMIÝASY
Topar başga oýunçylary transfer etmeýän bolsa, onda nämäniň hasabynda ýaryşlarda çykyş edýär diýen sowal ýüze çykyp biler. Bu sowalyň jogaby toparyň dürli ýaşlardaky düzümi bolup, klub baskly futbolçylary çagalykdan hataryna goşýar. 1971-nji ýylda ýaşlar üçin ýörite Lezamada futbol merkezi döredilýär. Bu ýerde 8 meýdança, köpugurly sport desgasy, metbugat hem-de saglyk otaglary ýaly binalar bar. Lezamada «Atletigiň» 2-nji ligadaky «B» topary, zenanlar toparlary («A», «B») hem-de dürli ýaşlardaky ýetginjekler toparlary türgenleşiklerini we resmi duşuşyklaryny geçirýär.
Soňky 5 ýylyň dowamynda her ýylda Lezamada kemala gelen azyndan 2 futbolçy esasy düzüme çagyryldy. «Atletik Bilbaonyň» esasy düzümindäki oýunçylaryň 85 göterimi toparyň ýaşlar düzüminde futbola başlan oýunçylardyr. Galyberse-de, sebitde futbola höwesek we ukyply ýetginjekleri saýlap, olaryň arasynda gelejekde «Atletikde» oýnap biler diýlenleri Lezama ugradýan 150-ä golaý kiçi topar bar. Tälimçilerine, Biskaý regionyndaky 20 skoutyna (oýunçy gözleýän hünärmen) hem-de şol 150-ä golaý topara bil baglaýan klub 10 ýaşdan kiçileri öz akademiýasyna almaýar. Akademiýa kabul edilýän ýaşlaryň diňe meýdançada däl, meýdançanyň daşynda-da jogapkärçilikleri bar. Topar ýaşlaryň futbol başarnygy bilen bir hatarda, aň-terbiýe, bilim babatda hem olaryň kämil bolmagyny talap edýär. Lezamadaky akademiýa ädimini äden ýaşajyk futbolçylar ilkinji günden başlap, arassaçylygy öwrenýär. Otaglaryň, daş-töweregiň arassaçylygyna aýratyn üns berilýär. Şeýle-de toparyň U19 (19 ýaşa çenliler) düzümindäki 21 futbolçynyň 13-si futbolyň daşyndan uniwersitetde hem okaýar. Gysgaça aýdylanda, topar öz futbolçylarynyň meýdançadan daşgary jemgyýetde hem kämil bolmagyna uly ýardam berýär.
Lezamadaky türgenleşikler barada hem belläp geçsek, akademiýada tälimçileriň iň esasy esewan edýän zady tehniki taýdan taýýarlygyň ýokary bolmagydyr. Ilki bilen tälimçileriň garamagynda oýunçynyň pozisiýasy, öňdengörüjiligi, ritmi hem-de tarap seljerişi babatda 30 minutlyk türgenleşik geçirilýär. Ondan soň taktiki hem-de şahsy türgenleşiklere ygtyýar berilýär. Türgenleşik ýerlerinde düzgünleri berjaý etmek hem-de çynlakaý çemeleşmek esasy orny eýeleýär.
OÝUNÇYLARYNY BAŞGA TOPARLARA ÝOKARY BAHA TRANSFER EDÝÄR
Klubuň kassasynda hemişe diýen ýaly 200 million ýewro möçberinde nagt pul bolýar. Beýleki klublara transfer edýän oýunçylarynyň esasynda maliýe babatda kynçylyk çekmeýän «Atletik Bilbao» topary başga klublara rekord baha transfer eden futbolçylary bilen hem meşhurlyga eýedir. Topar 2012-nji ýylda Hawi Martinesi «Bawariýa» (40 million ýewro), 2014-nji ýylda Ander Herreri «Mançester Ýunaýtede» (36 million ýewro), 2018-nji ýylda Aýmerik Laporteni «Mançester Sitä» (65 million ýewro) hem-de 2019-njy ýylda Kepa Arizzabalagany «Çelsi» toparyna (80 million ýewro, iň gymmat derwezeçi) ugradypdy.
«La Ligada», Şa Kubogynda birnäçe rekordyň eýesi hüjümçi Telmo Zarra, tanymal derwezeçi Hoze Anhel Iribar, Fernando Llorente, Aritz Aduriz ýaly futbolçylar toparyň taryhynda uly yz galdyran oýunçylardyr.
