Şu gün 10-njy martda hormatly Prezidentimiziň gatnaşmagynda türkmen türgeni Ýulduz Jumabaýewanyň mynasyp bolan altyn medalynyň gowşurylyş dabarasy geçirildi. Mälim bolşy ýaly, agyr atletikaçy türgenimiz Ýulduz Jumabaýewanyň 2018-nji ýylyň noýabr aýynda paýtagtymyz Aşgabatda geçirilen agyr atletika boýunça dünýä çempionatynda ýokary netije gazanypdy. Olimpiýa şäherçesiniň Başa-baş söweş sungaty sport toplumynda geçirilen dabara hökümet agzalary, ýurdumyzdaky daşary ýurtly diplomatik wekilhanalarynyň ýolbaşçylary, halkara guramalaryň ýurdumyzdaky wekilhanalarynyň ýolbaşçylary, ýerli we daşary ýurtly köpçülikleýin habar beriş serişdeleriniň wekilleri gatnaşdylar.
Hormatly Prezidentimiz türkmen türgeniniň dünýä çempiony hökmünde ykrar edilmegi bilen baglanyşykly geçirilen dabarada eden çykyşynda türkmen sportunyň mundan beýläk-de ösdürilmegine uly ähmiýet beriljekdigini belledi. Hormatly Prezidentimiz türkmen türgenine medalyny gowşuryp, oňa geljekki sport durmuşynda üstünlikler arzuw etdi.
Milli Liderimiz türkmen sportunyň taryhynda uly baýrakly orunlara mynasyp bolan türgenleriň köpdügine ünsi çekip, Altymyrat Orazdurdyýewiň agyr atletika boýunça dünýäniň 3 gezek çempiony bolandygyny, şeýle hem Marat Nyýazowyň 1960-njy ýylda geçirilen XVII Olimpiýa oýunlarynda sapançadan ok atmak boýunça kümüş medalyň eýesi, dünýäniň ýedi gezek, Ýewropanyň hem üç gezek çempiony bolandygyny belledi.
Dabara Halkara agyr atletika federasiýasynyň (IWF) ýolbaşçysy Maýkl Irani hem-de Halkara agyr atletika federasiýasynyň (IWF) kätibi, Aziýanyň agyr atletika federasiýasynyň baş sekretary Mohamed Hassan Jaloud medal gowşurylyş dabarasyna onlaýn görnüşde gatnaşdy.
Halkara sport guramalarynyň ýolbaşçylary Türkmenistanda agyr atletika sportunyň ösdürilmegine goşýan goşandy üçin milli Liderimize uly hoşallygyny bildirdi. Maýkl Ireni hem-de Mohamed Hassan Jaloud öz çykyşynda Türkmenistanyň adalatly sportuň dünýäde giňden dabaralanmagyna goşant goşýandygyny, türkmen türgeni Ýulduz Jumabaýewanyň gazanan bu üstünliginiň hem munuň aýdyň subutnamasy bolup durýandygyny belledi.
Ýeri gelende aýtsak, ozal netijeleri jemlenende nätakyklyga ýol berlen ýaryşlaryň jemleri boýunça türgen gyzymyz itekläp götermekde kümüş medalyň we silterläp götermekde bürünç medalyň eýesi bolupdy. Türkmen türgeniniň bäsdeşi, tailandly türgen bolsa, birinji orny eýeläp, altyn medala mynasyp bolupdy. Altyn medal gazanan tailandly türgen tarapyndan doping düzgünleriniň bozulandygy hem-de sport kwalifikasiýasyndan mahrum edilendigi sebäpli Halkara agyr atletika federasiýasynyň kadalaryna laýyklykda, medallaryň gaýtadan paýlanylmagynda türkmen türgeni Ýulduz Jumabaýewa altyn medalyň eýesi boldy. Netijede, Jumabaýewa itekläp götermekde hem-de umumylykda 2 altyn medaly gazandy hem-de ýetginjekleriň arasynda dünýä rekordyny goýdy.
Hormatly Prezidentimiziň adyndan awtoulag sowgat edildi
Türkmenistanyň sport abraýyny has-da belende galdyran, agyr atletika boýunça Dünýä çempionatynyň altyn medalynyň eýesi Ýulduz Jumabaýewa hormatly Prezidentimiziň adyndan “Lexus Sportplus LX570” awtoulagy sowgat edildi.
