UEFA Çempionlar ligasynda 1/8 finalynda “Portodyr” “Borussiýa Dortmund” toparlaryndan soň ýene iki çärýek finalçy hem belli boldy. Myhmançylykdaky birinji duşuşyklarda ýeňiş gazanan PSŽ bilen “Liwerpul” atlaryny soňky sekizlige ýazdyrmagy başardylar.
Pariždäki oýunda myhmançylykdaky “Barselona” diýseň erjel oýun görkezdi. Çekeleşikli geçen oýnuň 30-njy minutynda Kilian Mbappe 11 metrlik jerime urgusyndan tapawutlanyp hasaby açdy. Bu onuň Çempionlar ligasyndaky 25-nji goly boldy. Mbappe UÇL-niň taryhynda 25 gol geçiren iň ýaş futbolçy bolup, ol b
u ugurda Lionel Messiniň rekordyny aldy. Şeýle-de Mbappe bir möwsümde “Barselonanyň” derwezesinden 4 gol geçiren ilkinji futbolçy hökmünde hasaba alyndy. Oýnuň 37-nji minutynda Messi tapawutlanyp, katalonlary azda-kände umytlandyrdy. 45+3-nji minutda eminiň bellän 11 metrlik jerime urgusy duşuşygyň ikinji ýarymynyň has çekeleşikli boljagyna yşarat boldy. Ýöne Messi penalti urgusyny dürs urup bilmedi. Derwezeçi Keýlor Nawas topy saklamagy başardy. Ikinji ýarymda oýnuň jylawy Barselonanyň elinde bolsa-da, topa erk etmekde, derwezä urlan takyk urgularda öňe saýlansa-da myhmanlara hasapda öňe gidişlik başartmady. Netijede, oýun 1-1 deňlikde tamamlanyp, geçen möwsümiň finalçysy PSŽ 7-nji gezek çärýek finala çykdy. 2015-nji ýyldan bäri kubogy gazanyp bilmeýän “Barselona” topary boýny aşak Ispaniýa dolanmaly boldy. “Barselona” soňky gezek 2007-nji ýylda çärýek finala çykyp bilmändi.
