Şu gün Söwda-senagat edarasynyň Sergi merkezinde Türkmenistanyň Senagatçylar we telekeçiler birleşmesiniň döredilmeginiň 13 ýyllygyna bagyşlanan sergi öz işine başlady. Iki gün dowam etjek sergä TSTB-niň 200-e golaý agzasy gatnaşyp, olar azyk we azyk önümlerini gaýtadan işleýän, agrosenagat, gurluşyk, mebelleriň we durmuş tehnikalarynyň, gurluşyk materiallarynyň we elektrik enjamlarynyň önümçiliginde, IT-tehnologiýalar çygrynda, bank, ulag we logistika pudaklarynda, söwda we hyzmatlar, bilim, halk senetçiliginde we beýlekilerde öz gazananlaryny hem-de mümkinçiliklerini görkezýärler. Serginiň çäklerinde işewür gatnaşyklaryň ösmegine hem-de harytlaryň we hyzmatlaryň mahabatlandyrylmagyna, şeýle hem TSTB-niň düzümleýin bölümleriniň we kärhanalarynyň işine sanly tehnologiýalaryň ornaşdyrylmagyna ýardam edýän dürli çäreler meýilleşdirildi.
