ÜÇÜNJI IŇLIS FINALY
“Mançester Siti” bilen “Çelsiniň” arasynda oýnaljak ertirki final UEFA-nyň birinji derejeli bäsleşigindäki 3-nji iňlis finalydyr. Mundan öň 2008-nji ýylda “Mançester Ýunaýted” bilen “Çelsi” duşuşypdy we mankunianlar penaltilerden soň ýeňşini baýram edipdiler. 2019-njy ýylda-da “Liwerpul” kluby “Tottenham” toparyndan 3-1 hasabynda üstün çykypdy. Şol bir wagtyň özünde UEFA-nyň ýaryşlaryndaky 5-nji iňlis finalydyr (UEFA Kubogynyň finaly 1972 – “Tottenham”–“Wulwerhampton”, UEFA Ýewropa ligasynyň finaly 2019, “Çelsi”–“Arsenal”).
Galyberse-de, UEFA Çempionlar ligasynda bir ýurduň wekilleriniň arasyndaky 8-nji final bolar. Iňlis klublaryndan başga-da ispan klublary – 2000-nji ýylda “Real Madrid”–“Walensiýa”, 2014-nji we 2016-njy ýyllarda “Real Madrid”–“Atletiko Madrid”, italýan toparlary – 2003-nji ýylda “Milan”–“Ýuwentus”, nemes klublary – 2013-nji ýylda “Bawariýa”–“Borussiýa Dortmund” özara duşuşdylar.
ÖŇKI OÝUNLARDA “ÇELSI” ÖŇDE
“Mançester Siti” bilen “Çelsi” mundan ozal UEFA-nyň ýaryşlarynda 2 gezek özara duşuşyk geçirdiler. 1970/71 möwsüminde Ýewopanyň Kubokçylaryň Kubogy ýaryşynyň ýarym final oýunlary bolup, şonda “Çelsi” iki ýerde-de 1-0 hasaplar bilen ýeňiş gazanyp finala çykypdy we finalda “Real Madridi” 2-1 ýeňipdi. Iki topar Angliýanyň çempionatynda 166 gezek duşuşyp, “Çelsi” 68, “Mançester Siti” 58 sapar ýeňiş gazandy. 40 duşuşyk deňlikde tamamlandy.
