Futbolda klublaryň arasyndaky iň uly klub ýaryşy gürrüňsiz UEFA Çempionlar ligasydyr. Irki ýyllarda diňe ýurduň çempionlarynyň gatnaşyp bilýän ýaryşynda häzirki wagtda 32 klub ilki toparçalaýyn, soňra-da utulan-çykdy görnüşde özara bäsleşýärler. Ähli klublar bu ýaryşa gatnaşyp, kubogy eýelemek isleýär. Ýöne 66-njy möwsümi tamamlanyp barýan ýaryşda “Mançester Sitini” hem hasaba alanymyzda, 41 topar finala çykyp, şolaryň bary-ýogy 22-sine çempion bolmak başartdy.
Soňky gezek ýaryşda täze çempion 2012-nji ýylda hasaba alnyp, şol ýyl şu möwsümiň hem finalçylarynyň biri bolan “Çelsi” kubogy eýeläpdi. Şeýle-de soňky 3 ýyldan bäri ýaryşyň finalynda täze klub, ýagny ilkinji gezek finala çykýan toparlar peýda bolýar. Ýagny, 2019-njy ýylda “Tottenham”, 2020-nji ýylda PSŽ, bu ýylda bolsa “Mançester Siti” bäsleşigiň täze finalçylary boldy. “Tottenham” bilen PSŽ toparlaryna ilkinji final oýunlarynda kubogy almak başartmady. Ýöne soňky täze çempion bilen soňky täze finalçynyň arasyndaky finaldan soň, belki-de iň arzyly kubogy alanlaryň hataryna ýene biri goşulyp biler.
