Üçünji günüň 2-nji duşuşygy taryhy hasabatlara baý bolup, Awstriýanyň ýygyndysy çempionatyň debýutanty Demirgazyk Makedoniýa bilen duşuşdy. Buharestdäki “Nationala Arena” stadionynda oýnalan oýunda Awstriýanyň ýygyndysy 3-1 hasabynda ýeňiş gazandy. Oýnuň 18-nji minutynda Stefan Lainer hasaby açdy. Makedonlar bu gola 10 minutdan soň Goran Pandew bilen jogap berdi. 37 ýaşyndaky hüjümçi Demirgazyk Makedoniýanyň Ýewropa çempionatyndaky ilkinji goluny geçirdi. Şeýle-de ol çempionatda tapawutlanan iň ýaşuly 2-nji futbolçy hökmünde hasaba alyndy. Çekeleşikli geçen oýnuň 2-nji ýarymynda awstriýalylar has erjel oýun görkezdi. Oýnuň 78-nji minutynda Mihael Gregoriç Awstriýanyň öňe saýlady. Bu gol çempionatyň taryhyndaky 700-nji gol hökmünde taryha girdi. Şeýle-de 89-njy minutda toparyň tejribeli ýyldyzy Marko Arnautowiç tapawutlanyp, oýna soňky nokady goýdy. 3-1 hasabynda üstün çykan Awstriýanyň ýygyndysy Ýewropa çempionatlaryndaky 7-nji oýnunda ilkinji ýeňşini gazandy. Bu olaryň 1990-njy ýyldan soň uly ýaryşlardaky ilkinji ýeňşi boldy.
