Şu ýylyň başyndan bäri uly gürrüň bolup gelýän “Real Madrid”–Serhio Ramos gatnaşygy ahyry soňlandy. Bu barada taraplar resmi ýagdaýda habar berdiler. Şunlukda, “Real Madridde” bir döwür, tamamlandy. Başgaça aýdylanda, ady eýýämden klubuň taryhyna altyn harplar bilen ýazylan we rowaýata öwrülen Serhio Ramosyň “Real Madriddäki” 16 ýyllyk başdangeçirmesi tamamlandy. 35 ýaşyndaky goragçy 16 möwsümde “Realyň” düzüminde 671 duşuşyk geçirdi. Gol geçirýän goragçy hökmünde tanalýan Ramos şol oýunlarda 101 gezek tapawutlandy, 39 gola asistlik etdi. 2005-nji ýylyň tomsunda “Sewilýadan” transfer bolan Ramos Realyň düzüminde jemi 22 kubok gazandy. Ol “La Ligada” 5, Çempionlar ligasynda 4, FIFA Klublar arasy Dünýä Kubogynda 4 gezek çempion bolmak bilen Ispaniýanyň Super Kubogyny 4, UEFA Super Kubogyny 3 hem-de Ispaniýanyň Şa Kubogyny 2 gezek asmana göterdi.
Ispan metbugatyna görä, “Real Madridiň” Ramosa ozalky aýlygyndan 10 göterim az töleg bilen 1 ýyllyk şertnama teklip etdi. Ramosyň bolsa azyndan 2 ýyllyk şertnama isleýändigi habar berildi. Ady iňlis klublary, şol sanda PSŽ bilen agzalýan Ramosyň öňümizdäki günlerde täze toparynyň hem belli bolmagyna garaşylýar.
