Ispan metbugatynda Lionel Messiniň “Barselonany” bilen ylalaşandygyny habar berilýär. Argentinanyň ýygyndysy bilen Kopa Amerikany gazanyp, üstünden uly ýük aýrylan Messiniň 5 ýyllyk şertnama baglaşmaga razylyk berendigi habarda bellenilýär. Habarda super ýyldyzyň ozalky alýan aýlyk hakyndan 50 göterim az aljakdygy aýratyn aýdylýar. Messi katalonlardan ýyllyk 71 million ýewro hak alýardy. Taraplaryň şu aýyň ahyrlarynda şertnama gol çekişmegine garaşylýar. Mälim bolşy ýaly, maliýe düzgünleri sebäpli “Barselona” bilen Messiniň täze şertnamasynyň arasynda kiçeňräk mesele bardy.
2003-nji ýyldan bäri “Barselonada” oýnap gelýän Lionel Messi katalonlar bilen jemi 778 oýunda 672 gol geçirdi (305 asist). “La Ligada” 10, Çempionlar ligasynda 4 gezek çempionlyk gazanan Messi geçen hepdäniň ahyrynda milli ýygyndysy bilenem ilkinji kubogyny asmana göteripdi.
