UEFA Çempionlar ligasynyň, Ýewropa ligasynyň hem-de täze bäsleşik Konferensiýa ligasynyň toparçalarynyň bijeleri şu möwsümde-de, geljek möwsümde-de ýagny iki möwsümde Türkiýäniň Stambul şäherinde çekiler. Adatça toparçalaryň bijeleri Monte Karlo şäherinde (Monako) çekilýärdi. Diňe geçen möwsümde pandemiýa sebäpli Ženewada çekilipdi. UEFA Çempionlar ligasynyň bu ýylky bije çekiliş dabarasy 26-njy awgustda, Ýewropa ligasy we Konferensiýa ligasynyň bijeleri-de 27-nji awsgustda geçiriler.
2022/2023 möwsüminiň finaly Stambulda oýnalar
Şeýle-de, UEFA Çempionlar ligasynyň 2022/23 möwsüminiň finaly hem Stambulda oýnalar. Final oýnunyň soňky 2 möwsümde ilki Stambulda oýnaljakdygy mälim edilse-de, ikisinde-de pandemiýa sebäpli final duşuşyklary degişlilikde, Portugaliýanyň Lissabon we Porto şäherlerine geçirilipdi. Öňümizdäki möwsümiň finaly ozal habar berlişi ýaly Russiýanyň Sankt-Peterburg şäherindäki “Gazprom Arenada” oýnalar.
