Tennis boýunça ABŞ-nyň Sinsinnati şäherinde geçirilen “Western & Southern Open” ýaryşynyň finalynda erkekleriň arasynda germaniýaly Aleksander Zwerew bilen russiýaly Andreý Rublew duşuşdy. Möwsümiň 7-nji “ATP Masters” ýaryşy bolan bu bäsleşigiň finalynda Zwerew 6:2 we 6:3 hasaplar bilen ýeňiş gazandy. Erkekleriň arasynda 120-nji gezek geçirilen we umumy baýrak gaznasy 3 028 140 dollara deň bolan ýaryşda ilkinji sapar çempionl boldy. Bu onuň karýerasyndaky 17-nji ATP çempionlygydyr.
Şeýle-de, zenanlaryň arasyndaky finalda awstraliýaly Eşli Barti bilen şweýsariýaly Jil Taýhmann duşuşdy. Duşuşykda Barti 6:3 we 6:1 hasaplar bilen ýeňşini baýram etdi. Bu onuň WTA-nyň bäsleşiklerindäki 13-nji çempionlygydyr. Sinsinnattidäki bu bäsleşik zenanlaryň arasynda 93-nji gezek geçirilip, onuň umumy baýrak gaznasy 2 114 989 dollara deňdir.
Erkekleriň arasyndaky jübütleýin bäsleşikde ispaniýaly Marsel Granollers bilen argentinaly Horasio Zeballos, zenanlaryň arasynda awstraliýaly Samanta Stosur bilen Çžen Şuai ýeňiş gazandy.
