“Amerika Açyk” tennis ýaryşynda erkekleriň arasyndaky finalda germaniýaly Aleksander Zwerew bilen amerikaly Ben Şelton duşuşdy. 3 sagat 32 minutlap dowam eden finalda Zwerew 4 setde garşydaşyndan üstün çykmagy başardy. Zwerew 1-nji setde 6:3, 2-nji setde taý-brek bilen 7:6 hasaplar esasynda ýeňiş gazandy. 3-nji setde ýeňiş Şeltonyň peýdasynda tamamlandy (7:5). Ýöne 4-nji setde germaniýaly tennisçä ýeňiş gazanmak kyn düşmedi. 6:2 hasabynda üstün çykan Zwerew “Amerika Açykdaky” ilkinji çempionlygyny baýram etdi. Bu onuň “Amerika Açykdaky” 2-nji finaly bolup, 2020-nji ýylda awstriýaly Dominik Timden asgyn gelipdi. Umumylykda 2-nji “Uly tuwulga” çempionlygyny gazanan 29 ýaşyndaky Zwerew şu ýyl “Fransiýa Açykda” hem çempion bolupdy. 2025-nji ýylda “Awstraliýa Açygyň” finalynda utulan Zwerew şu ýyl 3-nji “Uly tuwulga” finalyny oýnady. Ol “Wimbledonda” Ýannik Sinnerden ýeňlipdi. Zwerew 1989-njy ýyldan bäri “Amerika Açykda” çempionlyk gazanan ilkinji germaniýaly tennisçi diýlip bellige alyndy.

Karýerasy boýunça 26-njy ATP kubogyny asmana göteren Zwerew “Açyk” döwürde “Uly tuwulgalardaky” ilkinji 2 çempionlygyny bir ýylyň dowamynda gazanan 4-nji tennisçi boldy.

“Amerika Açykda” 2003-nji ýyldaky Endi Roddigiň ýeňşinden bäri ýerli tennisçä çempion bolmak başardanok. 23 ýaşyndaky Ben Şelton “Amerika Açykda” soňky 20 ýylda Teýlor Fritsden (2024) soň finalda oýnan 2-nji amerikaly tennisçi boldy. Şelton ilkinji gezek “Uly tuwulga” ýaryşynyň finalynda oýnady.

“Amerika Açykda” soňky 18 ýylda erkekleriň arasynda hiç bir tennisçi hem çempionlygyny gorap bilmedi. Soňky gezek Rojer Federer 2004-2008-nji ýyllar aralygynda yzly-yzyna 5 çempionlyk gazanypdy. Şondan bäri Rafael Nadal bilen Nowak Jokowiç 4, Karlos Alkaras 2 gezek çempionlyk gazansa-da, olaryň çempionlyklary yzygiderli bolmandy.

Gyzykly bolup bilerЕЩЕ ОТ АВТОРА