Belarusyň Prezidenti Aleksandr Lukaşenko Duşenbe iş sapary wagtynda Täjigistanyň Prezidenti Emomali Rahmon bilen duşuşdy. Bu barada Belarusyň “belta.by” habarlary gullugy mälim etdi.
Döwlet baştutanlarynyň duşuşygy Aleksandr Lukaşenko Duşenbe geleninden az wagt soň geçirildi. Döwlet Baştutanlary ikitaraplaýyn hyzmatdaşlygyň ösüşi, sebitdäki harby-syýasy ýagdaý we ýakyn günlerde Täjigistanyň paýtagtynda Kollektiwleýin Howpsuzlyk Şertnamasy Guramasynyň we Şanhaý Hyzmatdaşlyk Guramasynyň sammitleriniň geçirilişini ara alyp maslahatlaşdylar.
Belarusyň Prezidenti Duşenbe gelen badyna Täjigistanyň ýolbaşçylary bilen ýene bir duşuşyk geçirdi: howa menzilinde Aleksandr Lukaşenko ýurduň Premýer-ministri Kohir Rasulzoda bilen duşuşdy.
Habar berlişi ýaly, Täjigistanyň paýtagty 15-17-nji sentýabrda Kollektiwleýin Howpsuzlyk Şertnamasy guramasynyň geňeşiniň mejlisini we Şanhaý Hyzmatdaşlyk Guramasynyň döwlet Baştutanlarynyň geňeşiniň mejlisini geçirer. Belarus döwletiniň Baştutany daşary ýurtly kärdeşleri bilen hem ikitaraplaýyn duşuşyklar geçirer.
