AFK Çempionlar ligasynda çärýek finala çykan toparlar belli boldy. Täjigistanyň “Istiklol” topary öz meýdançasynda Eýranyň “Persepolis” toparyndan 1-0 asgyn geldi. Ýeke-täk goly 90-njy minutda Torabi öz adyna ýazdyrdy. Saud Arabystanynyň “Al-Nassr” topary hem Eýranyň “Traktor” toparyndan şol hasap bilen üstün çykdy (Winsent Abubakar 11). Başga bir saud topary “Al-Hilal” başga bir eýran kluby “Esteglaly” Bafetimbi Gomisiň (39) hem-de Muhamed Al-Dawsariniň (56) gollary bilen 2-0 ýeňdi. BAE-niň iki topary – “Şarjah” bilen “Al-Wahda” klublarynyň özara duşuşygynda esasy wagt 1-1 deňlikde gutaryp, “Al-Wahda” 11 metrlik jerime urgularynda 5-4 öňe saýlandy.
Gündogar zolagynda koreý hem-de ýapon toparlarynyň özara duşuşygyndan soň, 1 ýapon, 2 koreý topary ýaryşy dowam etdirmäge hukuk gazandy. “Ulsan Hýundai” (G. Koreýa)–“Kawasaki Frontal” (Ýaponiýa) duşuşygynda hasap açylman, ýeňiji 11 metrlik jerime urgusy netijesinde koreý kluby boldy. Ýaponiýanyň “Nagoýa Grampus” topary bilen Günorta Koreýanyň “Daegu” toparynyň arasyndaky oýunda-da ýapon kluby 4-2 üstün çykdy. Duşuşykda ýapon toparynyň polşaly hüjümçisi Ýakub Şwierçok 3 gol geçirdi. “Serezo Osaka” (Ýaponiýa) bilen “Pohang Stilers” (G. Koreýa) toparynyň arasyndaky oýunda koreýler 1-0 ýeňiş gazandy. Ýaryşdaky 4-nji koreý kluby “Çeonbuk Hýundai Motors” öz meýdançasynda Tailandyň “BG Pathum Ýunaýted” toparyny 11 metrlik jerime urgularyndan soň ýeňlişe sezewar etdi (1-1, 4-2 p).
Çärýek finalyň bijeleri şu gün çekilip, duşuşyklar 16-17-nji oktýabrda oýnalar.
