Niderlandlaryň çempionaty Erediwizede Aýaksyň şemaly belentden öwüsýär. Paýtagt Amsterdamyň wekili soň laýyk 1 hepdäniň dowamynda 3 duşuşyk geçirdi. Topar şol 3 oýunda 19 gol geçirip, 1 goly öz derwezesinden goýberdi. Geçen hepdäniň çarşenbe güni UEFA Çempionlar ligasynda myhmançylykda Sporting Lissabon toparyndan 5-1 üstün çykan Aýaks şenbe güni çempionatyň çäginde öz meýdançasynda Kambuur toparyny 9-0 hasabynda ýeňdi. Bu duşuşykda 8 futbolçy tapawutlanyp, diňe Neres 2 gol geçirdi. Aýaks topary çempionatyň 6-njy tapgyrynda-da myhmançylykda Fortuna Sittard toparynyň derwezesinden jogapsyz 5 pökgi girizdi. Amsterdamlylara ýeňiş getiren gollary Berghuis, Mazraui, Tadiç, Kudus hem-de Tagliafiko öz adyna ýazdyrdy. Aýaks topary şu möwsümde çempionatda 3-nji gezek 5-0 hasabynda ýeňiş gazandy. Olar 1-nji tapgyrda NEK Niýmegeni, 3-nji tapgyrda-da myhmançylykda Witesseni 5-0 hasaplar bilen ýeňipdi. Diňe Twente bilen 1-1 deňme-deň oýnan Aýaks 6 oýunda 16 utuk toplap, birinji orunda barýar. Amsterdamlylar şol 6 oýunda 27 gol geçirip, diňe 1 gol geçirtdiler. Aýaks indiki duşuşygyny şenbe güni öz meýdançasynda Groningen bilen geçirer.
