29-njy sentýabrda Türkmenistanyň Jemgyýetçilik guramalarynyň merkezinde hem-de Türkmenistanyň Daşary işler ministrliginiň Halkara gatnaşyklary institutynda hormatly Prezidentimiziň «Garaşsyzlyk – bagtymyz» atly täze kitabynyň tanyşdyrylyş dabarasy geçirildi. Bu kitap şöhratly senä – Türkmenistanyň mukaddes Garaşsyzlygynyň 30 ýyllygyna bagyşlanan özboluşly esere öwrüldi.
Türkmenistanyň Jemgyýetçilik guramalarynyň merkezinde geçirilen dabara Milli Geňeşiň Mejlisiniň we Halk Maslahatynyň, jemgyýetçilik guramalarynyň hem-de köpçülikleýin habar beriş serişdeleriniň ýolbaşçylary we wekilleri gatnaşdylar.
Dabarada halkymyzyň baý medeni mirasynyň subutnamalary bolan şekillendiriş we amaly-haşam sungatynyň nusgalary sergi diwarlyklaryny bezedi. Döredijilik toparlarynyň, meşhur aýdymçylaryň we sazandalaryň joşgunly çykyşlary baýramçylyk çärelerine ajaýyp öwüşgin çaýdy.
Kitapdaky «Türkmen halky – döwlet häkimiýetiniň ýeke-täk eýesi» diýen bölümde hut milli özboluşlylygyň hem-de halkymyza mahsus bolan sabyr-kanagatlylygyň netijesinde, ýaş, özbaşdak döwletiň kemala gelýän döwründe hökman we çözülmegini talap edýän ençeme çylşyrymly meseleleri ýeňip geçmegiň başardandygy tötänden nygtalmaýar.
Bu ýere ýygnananlar döwletiň hukuk esaslaryny yzygiderli pugtalandyrmaga hem-de jemgyýetimizi demokratiýalaşdyrmaga gönükdirilen yhlasly işleri üçin hormatly Prezidentimize tüýs ýürekden hoşallyk bildirdiler. Ýurdumyzda hakyky halk häkimiýetliligi berkarar etmek boýunça alnyp barylýan işlerde iki palataly parlamentiň we köppartiýaly ulgamyň döredilmeginiň möhüm ädim bolandygy nygtaldy.
Ýurdumyzyň hemişelik Bitaraplyk derejesine eýe bolunmagy möhüm waka öwrüldi. Geçen ýylyň dekabrynda Bitaraplygymyzyň 25 ýyllygy dabaraly bellenildi.
Mälim bolşy ýaly, 2015-nji ýylyň 3-nji iýunynda Birleşen Milletler Guramasynyň Baş Assambleýasynyň 69-njy mejlisinde halkara bileleşigine agza döwletleriň ählisiniň – 193 döwletiň goldamagy bilen, Türkmenistanyň hemişelik Bitaraplygy hakynda ikinji gezek ýörite Kararnama kabul edildi.
Çykyş edenler Garaşsyzlyk derejesiniň Türkmenistanyň Ýer ýüzüniň has durnukly ösýän döwletleriniň hataryna girendigini, gyzyklanma bildirýän ýurtlar hem-de abraýly guramalar bilen köpugurly hyzmatdaşlygy ýola goýmak üçin ygtybarly binýat döredendigini, şol döwletler we guramalar bilen gatnaşyklaryň ikitaraplaýyn we köptaraplaýyn görnüşde üstünlikli ýola goýulýandygyny bellediler.
Türkmenistanyň Daşary işler ministrliginiň Halkara gatnaşyklary institutynyň uly mejlisler zalynda geçirilen dabara Türkmenistanyň Daşary işler ministrliginiň işgärleri, Döwlet, hukuk we demokratiýa institutynyň ýolbaşçylary we işgärleri, akkreditirlenen daşary ýurtly žurnalistler, Halkara gatnaşyklary institutynyň professor-mugallymlary we talyp ýaşlary gatnaşdylar.
Bu ýerde çykyş edenler hormatly Prezidentimiziň kitabynda berilýän gymmatly maglumatlar barada gürrüň berdiler.
Çykyş edenler gymmatly eserde ýurdumyzyň Garaşsyzlyk ýyllarynda geçen ýoly, dürli ugurlarda gazanylan üstünlikler barada degerli maglumatlaryň berilýändigini belläp geçdiler.
Türkmen döwlet neşirýat gullugy tarapyndan ýokary çap usulynda neşir edilen kitap üç dilde bolup, «Howpsuz, özerkli ýaşaýşyň galasy», «Türkmen halky – döwlet häkimiýetiniň ýeke-täk eýesi», «Budur türkmen binasy», «Galkynyşyň, ösüşiň, bagtyýarlygyň täze taryhy eýýamy», «Gözbaşlar joşly bolsa, bagtyňdan rowaçlyk hem üstünlik çykar», «Türkmen topragy – bereket mekany», «Türkmen halky – dörediji we gurujy halk», «Nusgalyk işler, ilkinjilik, täze önümçilikler, baý tejribe – ösüşiň özeni!», «Ýoluňyz ak bolsun!», «Kalbyňyz we ojagyňyz nurly bolsun!», «Ýaşyl ykdysadyýet – ýaşaýyş ýörelgesi», «Bazary baryň baýlygy bar» hem-de «Garaşsyzlyk bilen geçmişlidiris, şu günlüdiris we geljeklidiris» diýen bölümler bar.
Şu çärelere gatnaşyjylar Ýüzlenme kabul edip, ata Watanymyzyň mukaddes Garaşsyzlygynyň şanly 30 ýyllyk senesine bagyşlan ajaýyp döredijilik sowgady üçin hormatly Prezidentimize tüýs ýürekden hoşallyk bildirdiler.
