UEFA Çempionlar Ligasynda “A” toparçada faworitler ýeňiş gazandy. Öňdebaryjy PSŽ öz meýdançasynda Leipsigi kynlyk bilenem bolsa 3-2 hasabynda ýeňdi. PSŽ 9-njy minutda Mbappeniň goly bilen hasaby açsa-da, nemes kluby 28-nji minutda Andre Silwanyň, 57-nji minutda-da Mukieleniň gollary bilen öňe saýlandy. Oýnuň soňky 25 minutynda 2 gol geçiren Lionel Messi toparyna ýeňiş getirdi. Ol 67-nji minutda hem-de 74-nji minutda penaltiden tapawutlanyp, onuň Çempionlar Ligasyndaky gollarynyň sany 123-e ýetdi. Messi Çempionlar Ligasynda 34-nji gezek bir duşuşykda 2 we ondan köp gol geçirdi. Şeýle-de Messiniň 2021-nji ýylda geçiren gollarynyň sany 40-a ýetip, ol 12-nji gezek şeýle başarnyk görkezdi.
Toparçadaky beýleki oýunda Mançester Siti myhmançylykda Klub Brýuggeni 5-1 ýeňdi. Mançester Sitiniň gollaryny Kanselo (30), Mahrez (43 p, 84), Wolker hem-de Palmer öz atlaryna ýazdyrdylar. Klub Brýuggeniň ýeke-täk goluny-da Hans Waneken derwezä girizip, ol bassyr 5 oýundan bäri UÇL-de tapawutlanyp gelýär.
Guardiolanyň tälim berýän toparlary 19-njy gezek UÇL-de 5 we 5-den köp gol geçirdi. Ispan tälimçisi bu ugurda Ferguson we Wengerden ep-esli öňde barýar.
