Italiýanyň çempionaty Serie A-da sanawyň lideri Napoli öz meýdançasynda soňky tapgyrlarda şowly çykyş edýän Hellas Werona bilen duşuşdy. Çekeleşikli geçen oýun 1-1 deňlikde tamamlandy. Ilki bilen hasaby myhmanlar açyp, Jowanni Simeone 13-nji minutda Weronany öňe saýlady. 18-nji minutda Di Lorenzo hasaby deňledi. Oýnuň ahyrlarynda Weronanyň 2 futbolçysy gyzyl kart aldy. Şeýlelikde, ýeňlişsiz barýan Napoli şu möwsümde 2-nji gezek deňme-deň oýnady. Tomusda Luçano Spallettini tälimçilige bellän Napoli Serie A-da aprel aýyndan bäri, ýagny 21 duşuşykdan bäri ýeňilmän gelýär. Olar soňky gezek geçen möwsümde 7-nji aprelde Ýuwentusdan 2-1 utulypdy. Napoli topary şol 21 oýunda 16 ýeňiş gazandy, 5 gezegem deňme-deň oýnady. Napoli geçen möwsümiň soňky duşuşygynda-da Werona bilen öz meýdançasynda 1-1 deňme-deň oýnapdy. Napoliniň indiki duşuşygy Inter bilen bolup, duşuşyk milli ýygyndylar arakesmesinden soň 21-nji noýabrda oýnalar.
“Lasio” ýeňdi, “Roma” ýeňildi
Serie A-da Lasio öz meýdançasynda Salernitanany Immobile, Pedro hem-de Luis Albertonyň gollary bilen 3-0 utdy. Roma myhmançylykda Wenesiýadan 3-2 asgyn geldi (Kaldara 3, Aramu 65 p, Okereke 74 – Şomuradow 43, Abraham 45+2).
