Uçar gatnawynyň ygtybarlydygy sebäpli olarda ýolagçylar we daşalýan ýükler üçin mümkin boldugyça ýerleriň ählisi ulanylmaga çalşylýar. Sebäbi howa gämisi näçe köp ýolagçy gatnatsa, şonça-da girdejili bolýar. “Airbus” kompaniýasy uçarlaryň içiniň giňişligini gysga wagtda üýtgedip bolýan täze usuly işläp taýýarlaýar. Kompaniýanyň döreden A3 atly şereketi uçuşyň maksadyna laýyklykda, onuň içinde gysga wagtda kabinalary oturtmagy teklip edýär. Şeýlelikde, uçarlarda “birinji klas”, “biznes klas” ýa-da “ekonomi klas” ýaly bölümleriň ýerine çaýhana, ýatylýan otag ýaly başgaça bölümler hem bolar. Şeýle-de çagalar üçin ýörite oýun meýdançasy hem bolar.
Bu usul ilkinji nobatda, ýük gatnawyna niýetlenen A330 modellerde ulanylar. Sebäbi olarda uly gapylar bolup, bulardan taýýar kabinalary uçara aňsatlyk bilen girizmek mümkin. Olar, esasan hem, has uzak aralyga gatnaýan uçarlarda peýdalanylar. Ýewropanyň uçar öndüriji kompaniýasy 2013-nji ýylda içini üýtgedip bolýan uçarlaryň önümçiligi üçin ýörite patent alypdyr. Hünärmenler uçarlara kabinalar ýerleşdirilende, olaryň agramynyň uçaryň deňagramlylygyny bozmajak derejede bolmagyna aýratyn üns berýärler. Şeýle uçarlar ýolagçylaryň uçuş döwründe olaryň wagtyny gyzykly geçirmeklerine mümkinçilik berer.
