Soňky iki aýdan bäri Mançester Ýunaýtediň norwegiýaly tälimçisi Solskaýer barada “indi gidýär”, “şindi gidýär”, “bu soňky duşuşygy”, “şu oýundan soň gidýär” diýen gürrüňler köp edildi. Öz meýdançasynda Liwerpuldan 5-0 utulan duşuşygyndan soň gitmelidi ýa-da topardan ugradylmalydy gürrüňleri köp edildi. Ine-de ahyry şol gürrüňler hakykat ýüzüne öz beýanyny tapdy. Mançester Ýunaýted kluby ahyry tälimçisi Ole Gunnar Solskaýeri (Sulşeri) topardan ugratdy. Klubuň ýolbaşçylarynyň toparyň Watfordan 4-1 hasabynda utulmagyndan soň sabyr käsesi dolup, ençeme gezek berlen puryjadan soň ahyry Solskaýeri wezipesinden boşatdylar. Klub norwegiýaly ozalky futbolçysynyň tälimçiliginde 168 oýunda 91 gezek ýeňiş gazanyp, 40 sapar utuldy. Topara ýeke kubok hem gazandyryp bilmedik Solskaýer 2018-nji ýylyň 19-njy dekabrynda Ýunaýtediň tälimçiligine bellenipdi. Tas 3 ýyla golaý bu klubuň tälimçisi bolan Solskaýeriň ýolbaşçylygynda Ýunaýted şu möwsümde soňky 7 duşuşykda diňe 1 gezek ýeňiş gazandy. Mançester Ýunaýted häzirki wagtda Premier Ligada 12 tapgyrdan 17 utuk bilen 8-nji ýerde barýar. Topara wagtlaýynça Maýkl Kerrigiň tälim berer. Toparyň tälimçisi bolmak ugrunda Zinedin Zidan, Maurisio Poçettino, Brendan Rojers dagynyň atlary agzalar. Hatda Kerrigiň wagtlaýynça däl, dowamly tälimçi bolmagy hem mümkin.
