Angliýanyň çempionatynda 15-nji tapgyrdan öň sanawyň lideri Çelsi London derbisinde myhmançylykda West Hamdan 3-2 asgyn geldi. 2 gezek öňe geçen Çelsi toparyna bu üstünligini goramak başartmady. Çelsiniň gollaryny 28-nji minutda Tiago Silwa bilen 44-nji minutda Meýson Maunt geçirdi. Liwerpuldan soň Çelsini hem ýeňen West Ham toparynyň gollaryny Lanzini (40 p), Bowen (56) hem-de oýnuň tamamlanmagyna 3 minut galanda, Masuaku (87) derwezä girizdi. 8 oýundan soň utulan Çelsi liderligi-de Mançester Sitä aldyrdy. Siti bu tapgyrda myhmançylykda Watfordy Sterling hem-de Bernardo Silwanyň (2) gollary bilen 3-1 ýeňdi.
Myhmançylykda Wulwerhempton bilen duşuşan Liwerpul 90+4-nji minutda Diwok Originiň goly bilen ýeňşini baýram etdi.
Täze tälimçisi Ralf Ragnigiň ilkinji duşuşygynda Mançester Ýunaýted öz meýdançasynda Kristal Palasy 1-0 utdy. Ronaldo we ýoldaşlaryna ýeňiş getiren ýeke-täk goly Fred öz adyna ýazdyrdy.
Konteniň tälimçiliginde şowly netijeler alýan Tottenham Londonda Norwiçi 3-0 ýeňdi. Demirgazyk londonlylara ýeňiş getiren gollary Lukas Moura, Sançes hem-de Hyn Min Son geçirdi.
