Premier Liganyň wekili Aston Willa topary Barselonanyň özünden garaşylýan tamany ödäp bilmedik braziliýaly ýarymgoragçysy Filippe Koutiniony transfer etdi. Birmingemliler 29 ýaşyndaky futbolçy bilen möwsümiň ahyryna çenli kärendesine şertnama baglaşdylar. Oýunçynyň görkezjek başarnygyna laýyklykda, möwsümiň ahyrynda gerek bolan ýagdaýynda täze şertnama gol çekiler. Şeýlelikde, Aston Willanyň tälimçisi Stiwen Jerrard bir döwürler bile çykyş eden topardaşyny klubuň düzümine goşdy. Koutinio 2012-2018-nji ýyllarda Liwerpulda oýnapdy. Ol Jerrard bilen 63 oýunda bile çykyş edipdi. Futbola ýurdunyň Wasko da Gama klubunda başlan Koutinio Inter, Espanýol (kärendesine), Barselona hem-de Bawariýa (kärendesine) toparlarynyň köýnekçesini geýdi.
