Oskar baýraklarynyň buşlukçysy hasaplanýan Altyn globus baýraklarynyň bu ýylky ýeňijileri mälim edildi. Ýeňijiler gyzyl halysyz, tomaşaçysyz, hatda teleýaýlymsyz ýagdaýda Altyn globusyň resmi twitter hasaby arkaly habar berildi. Hollywood-daky daşary ýurtly žurnalistler guramasynyň guramaçylygynda gowşurylýan Altyn globus baýraklarynda iň gowy drama filmi diýlip, zenan režissýor Jeýn Kampionyň “Itiň güýji” (The Power of the Dog) filmi saýlandy. Iň gowy komediýa ýa-da mýzukal film ugry boýunça Stiwen Spilbergiň surata düşüren “Westsaýdyň hekaýasy” (West Side Story) atly aýdym-sazly film baýraga laýyk görüldi.
79-njy Altyn globus baýraklarynda drama filmleriniň iň gowy aktýory “Şa Riçard” (King Richrad) filmindäki keşbi üçin Will Smit, “Rikardo bolmak” (Being the Ricardos) filmindäki keşbi üçin Nikol Kidman iň gowy aktrisa diýlip saýlandy. Komediýa ýa-da mýuzikal filmleriniň gowy aktýory we aktrisasy diýlen ugurlarda degişilikde Andrýuw Garfild (“Tik-tak Bum”, tick, tick… BOOM) bilen Raçel Zegler (“Westsaýd hekaýasy”, West Side Story) “Altyn globusa” mynasyp görüldi.
Ikinji plandaky iň gowy aktýor “Itiň güýji” filmindäki keşbi üçin Kodi Smit-MakFi, ikinji plandaky iň gowy aktrisa diýlibem “Westsaýd hekaýasy” filmindäki keşbi esasynda Ariana DeRosa saýlandy.
“Itiň güýji” filmini surata düşüren zenan režissýor Jeýn Kampiona iň gowy režissýor baýragy berildi. “Belfast” filminiň edebi esasyny ýazanan Kennet Brana iň gowy ssenariý baýragy bilen sylaglandy.
“Dýun” (Dune) filminiň sazlaryny döreden ussat kompozitor Hans Zimmer 3-nji gezek Altyn globus baýragyny gazandy. Jeýms Bond filmleriniň soňkusy “Ölmäge wagt ýok” (No Time To Die) filminiň adybir aýdymy iň gowy aýdym diýlip saýlandy. Aýdymy Billi Aýliş bilen Finneas O’Konnell bilelikde ýerine ýetirýär. Iňlis dilinde bolmadyk iň gowy film baýragyna-da ýaponiýaly Rýusuke Hamaguçiniň “Meniň ulagymy sür” atly filmi laýyk görüldi. “Disney”-iň önümi bolan “Enkanto” (Encanto) multfilmi-de iň gowy animasiýa diýlip saýlandy.
