19 ýaşly Zara Ruterford Ýeriň daşyndan uçarda ýeke özi aýlanan iň ýaş zenan hökmünde rekord goýdy. Asly Belgiýadan bolan Ruterford häzirki wagtda Angliýada ýaşaýar. Ol 155 günde bir orunlyk uçar bilen Ýer ýüzüni aýlanyp Ginnesiň Bütindünýä rekordlar kitabyna adyny ýazdyrdy. Şeýlelikde ol 30 ýaşly amerikaly Şaesta Waiziň rekordyny täzeledi. Ruterford Ýeriň daşyndan üç aýda aýlanmagy maksat edinýän eken. Emma garaşylmadyk howa şertleri onuň syýahatynyň wagtyny uzaldypdyr. Ol syýahatynyň soňky günlerinde Ýewropa ýurtlarynda birnäçe günläp uçup bilmändir. Ruterford bu sebitde gyşyň gazaply gelendigini we uçmagyna päsgelçilik döredendigini belleýär. Ol syýahatynyň dowamynda Sibirde 35 dereje sowuga, Indoneziýada 32 dereje yssa çydamaly bolupdyr. Ümür, tokaý ýangynlary we beýleki päsgelçilikler hem onuň syýahatynyň bökdemegine getiripdir. Şeýlelikde, onuň syýahaty 5 aýa çekipdir. Ruterford jemi 52 müň kilometr ýol geçipdir. Ol bäş materikde, 41 ýurtda düşläpdir.
Zara Ruterford 6 ýaşyndan bäri kiçi uçarlara münýär. 14 ýaşynda özbaşdak uçar dolandyrypdyr. Ruterford dünýäde ýaş gyzlaryň awiasiýa, bilim, matematika, inženerçilik we tehnologiýa bilen gyzyklanmaklaryna höwes döretmek isleýändigini belleýär. Ol geljekde astronawt bolmagy maksat edinýändigini aýtdy.
Ýeri gelende bellesek, 1987-nji ýylda Owganystanda doglan Şaesta Waiziň 2017-nji ýylda bir motorly, bir orunlyk uçarda dünýäni aýlanyp çykan iň ýaş zenan hökmünde rekord goýupdy.
Bu ugurda erkekleriň arasyndaky rekord angliýaly Trawis Ludlowa degişli. Ol bu rekordy geçen ýylyň iýulynda 18 ýaşynda wagty goýupdy.
