Bir döwürler Mançester Siti, Stok Siti, Swansi ýaly klublaryň köýnekçesini geýen kot-d’Iuwarly hüjümçi Wilfred Boni 505 günden soň futbola dolandy. Ol Niderlandlaryň NEK Niýmegen topary bilen möwsümiň ahyryna çenli şertnama baglaşdy. Soňky gezek Saud Arabystanynyň Al-Ittihad toparynda çykyş eden 33 ýaşyndaky Boni, 10 aýdan soň, ýagny 2020-nji ýylyň 1-nji noýabrynda klubdan ugradylypdy. 505 günläp futbolyň daşynda galan hüjümçi niderland toparynyň düzümine goşulanyna örän şatdygyny belläp geçdi. Ol 2011-2013-nji ýyllarda başga bir niderland topary Witesseniň köýnekçesini geýip, bu klubda 77 oýunda 58 gol geçiripdi. Boni şu wagta çenli klublarda geçiren 337 duşuşygynda 150 gezek tapawutlandy.
