Amerikan futboly boýunça NFL-de möwsümiň çempionyny kesgitleýän “Super Bowl” duşuşygy geçirildi. Kaliforniýa ştatynyň Inglwud şäherindäki 100 müň orunlyk “SoFi” stadionynda geçirilen duşuşykda AFC-niň çempiony “Sinsinnati Bengals” bilen NFC-niň çempiony “Los Anjeles Rams” özara güýç synanyşdy. Los Anjeleslileriň öz stadiony bolan “SoFi” stadionyndaky duşuşykda ýer eýeleri 23:20 hasabynda ýeňiş gazandy. Şeýlelikde, “Los Anjeles Rams” topary 2-nji gezek Super Bowl kubogyna mynasyp boldy. Topar 1999-njy ýylda ýagny 23 ýyl mundan ozal (şol wagtlar klubuň ady “St. Luis Rams” toparydy) ilkinji gezek “Super Bowl” kubogyny eýeläpdi. Klub bu ýaryşda NFL-iň birleşmeginden hem-de “Super Bowl” görnüşine geçmezinden öň 1945-nji we 1951-nji ýyllarda-da çempionlyk gazanypdy.
“Los Anjeles Rams” toparynyň tälimçisi Şon MakWeý NFL-iň taryhynda “Super Bowl”-y gazanan iň ýaş tälimçi boldy (36 ýaş 20 gün). Toparyň 28 ýaşyndaky ýyldyzy Kuper Kupp duşuşygyň iň ökde oýunçysy (MVP) diýlip saýlandy.
56-njy gezek geçirilen “Super Bowl” duşuşygynda yzly-yzyna ikinji sapar ýer eýeleri kuboga mynasyp boldy. Duşuşygyň arakesmesinde Dr. Dre, Snoop Dogg, 50 Cent, Eminem, Mary J. Blige, Kendrick Lamar, Sean Forbes, Warren Snipe ýaly rep, hip-hop hem-de soul aýdym-saz görnüşiniň görnükli wekilleri stadiona ýygnanan 70 müň tomaşaçynyň göwünlerini galkyndyrdy.
Häzirki wagta çenli çempionlygy bolmadyk “Sinsinatti Bengals” topary 1982-nji we 1989-njy ýyllardan soň 3-nji gezek finalda ýeňlişe sezewar boldy.
