UEFA Çempionlar Ligasynda 1/8 finalyň duşuşyklaryna badalga berildi. Tapgyryň iň esasy duşuşygynda PSŽ bilen Real Madrid duşuşdy. Ýer eýeleriniň artykmaçlygynda geçen oýunda parižliler 1-0 hasabynda ýeňiş gazandy. PSŽ toparyna ýeňiş getiren ýeke-täk goly 90+4-nji minutda Neýmaryň pasyndan soň Kilian Mbappe derwezä girizdi. Bu gola çenli PSŽ toparynyň oýunçylaryna birnäçe amatly pursatlardan peýdalanmak başartmady. Şolaryň biri-de Lionel Messiniň 61-nji minutda ýerine ýetiren penaltisi bolup, ony derwezeçi Tibo Kurtua sowmagy başardy. Şeýlelikde, soňky minutda gelen ýeňiş PSŽ-ni häzirlikçe bir ädim öňe saýlady. Jogap duşuşygy 9-njy martda oýnalar.
* Kilian Mbappe UÇL-däki soňky 13 duşuşygynda 13 gol geçirdi.
* Real Madrid soňky gezek 1/8 finalda 2010-njy ýylda gol geçirip bilmändi.
* Oýna soň giren Garet Beýl UÇL-däki 100-nji duşuşygyny geçirdi.
* Lionel Messi 8 oýundan bäri Realyň derwezesinden gol geçirip bilenok. Messi soňky sapar 2018-nji ýylda Realyň derwezesinden gol geçiripdi. Messi ilkinji gezek Realyň derwezesinden penalti geçirip bilmedi. Ol mundan ozal Realyň derwezesine garşy 6 gezek penaltini dürs urmagy başarypdy.
