UEFA Çempionlar Ligasynda şu gije 1/8 finalyň ýene-de 2 duşuşygy oýnalar. Olaryň iň köp ünsi çekýäni Inter bilen Liwerpulyň arasyndaky duşuşyk bolar. Milan şäherindäki Juseppe Meazza stadionynda oýnaljak duşuşyk 01:00-da başlap, oňa polşaly Simon Marçiniak eminlik eder. Duşuşyk iki toparyň arasyndaky 5-nji oýun bolup, ondan öňki 4 duşuşygyň 3-sinde Liwerpul, 1-inde hem Inter ýeňiş gazanypdy. Soňky gezek 2008-nji ýylda 1/8 finalda gabatlaşan iki toparyň şol tutluşygynda Liwerpul myhmançylykda 1-0, öz meýdançasynda 2-0 ýeňipdi. Toparlar mundan 57 ýyl ozal, ýagny 1965-nji ýylda-da şu ýaryşyň ýarym finalynda duşuşypdylar. Şonda Angliýadaky oýunda Liwerpul 3-1 ýeňipdi, ýöne jogap duşuşygynda Inter 3-0 utup, finala çykypdy. Ahyrynda-da Inter yzly-yzyna 2-nji gezek yklymyň iň uly kubogyny gazanypdy.
BAWARIÝA 2 ÝYL ÖŇ 6-2 ÝEŇIPDI
Beýleki duşuşykda iň goňşy ýurduň wekilleri – Awstriýanyň RB Salsburg topary bilen Germaniýanyň Bawariýa kluby duşuşar. 01:00-da başlanjak oýna angliýaly Maýkl Oliwer eminlik eder. Iki topar mundan ozal bu ýaryşyň çäginde 2 gezek gabatlaşyp, Bawariýa 2 oýunda-da garşydaşyny ýeňipdi. 2020-nji ýylda toparçalarda duşuşan iki toparyň Münhendäki oýnunda Bawariýa 3-1, Salsburgda-da 6-2 hasabynda utupdy.
