Smartfonlary üçin ýokary durulykda surata düşürip bilýän kamera linzalaryny öndürýän “Sony” kompaniýasy iň uly linzany taýýar etdi. Häzirki wagtda telefonlaryň kameralary adaty foroenjamlar bilen bäsleşip biljek derejä ýetdi. Birnäçä linza ýerleşdirilen linzalar “akylly” programmalary ulanmak arkaly ýokary durulykda surata düşürmäge mümkinçilik berýärler. Berlen maglumata görä, “Exmor IMX800” atly 1/1,1 dýuým ululygyndaky linza käbir telefonlarda synagdan geçirilip başlandy. Bu linza 50 megapiksel durulygynda surata düşürmäge mümkinçilik berýär. Mundan 8 ýyl töweregi wagt ozal “Panasonic” kompaniýasy CM1 atly smartfon linzasyny öndüripdi. Onuň ululygy 1 dýuýma barabardy. Linzanyň ululygy surata düşürilende ýagtylykdan has köp peýdalanmagyna mümkinçilik berýär. “Sony”-nyň işläp taýýarlan linzasynyň “Xiaomi 12 Ultra” smartfonynda ulanyljakdygy mälim edildi. “Xiaomi” kompaniýasy ýokary durulykda surata alýan telefonlary öndürmegi bilen tanalýar. Geçen ýyl bu kompaniýanyň çykaran “Mi 11 Ultra” telefonynda “Samsung”-yň 50 MP durulygynda surata düşürýän GN2 kamera linzasy oturdylypdy.
”Sony” bolsa, iň köp smartfon kamerasy öndürýän kompaniýa bolmagynda galýar. “Strategy Analytics” şereketiniň maglumatyna görä, ýapon brendi telefon kameralarynyň 45 göterimini öndürýär. Bu ugurda ikinji ýerde 26 göterim bilen “Samsung” bar. “OmniVision” atly şereket bolsa 11 göterimlik paýy bilen üçünji ýeri eýeleýär.
Gülşat Babaýewa,
S.A.Nyýazow adyndaky Türkmen oba hojalyk uniwersitetiniň talyby
