“Sensor Tower” şereketi mart aýynda iň köp göçürilip alnan mobil oýunlaryň sanawyny taýýarlady. Mobil oýunlara soňky ýyllarda islegiň ýokarlanmagy bilen programma öndürijiler üçin girdejili pudaga öwrüldi. 2010-njy ýylda ýaýbaňlanyp başlan bu oýunlar birnäçe ýylyň dowamynda oýun oýnamaga niýetlenen ýörite enjamlar bilen bäsdeşlik etjek derejä ýetdi. Mobil oýunlara islegiň ýokary bolmagynyň sebäbi islendik ýerde, islendik wagtda oýnap bilinmegidir. Mobil oýunlaryň hiliniň artmagy hem olara bolan islegi ýokarlandyrýar.
“Sensor Tower”-iň sanawyna görä, “Homa Games” tarapyndan işlenip taýýarlanan “Merge Master” birinji bolupdyr. Bu programma 28 million gezek göçürilip alnypdyr. Ulanyjylaryň 38 göterime Hindistandan, 7,5 göterimi Braziliýadan bu oýny alypdyr.
“Garena Free Fire” oýny ikinji bolupdyr. Bu oýun fewraldaky sanawda birinji bolan eken. Oýun bir aýyň dowamynda 25,5 million gezek göçürilipdir. Oýny göçürip alanlaryň 35,5 göterimini hindistanly, 9 göterimini braziliýaly ulanyjylar emele getiripdir. Köpleriň halaýan oýunlarynyň biri bolan “Subway Surfers” bolsa, diňe “App Store”-da birinjiligi eýeläpdir.
Global oýun pudagy şu ýylyň mart aýynda “App Store” we “Google Play Store” bilelikde hasaplananda, 4,7 milliard oýun programmasy göçürilip alnypdyr. Bu görkeziji geçen ýylyň degişli döwründäkiden 2,4 göterim ýokary bolupdyr. Mobil oýunlara iň köp gyzyklanma bildirýän ýurt Hindistan bolupdyr. Bu ýurtda 761 million oýun göçürilip alnypdyr. Şeýlelikde göçürilip alnan oýun programmalarynyň 16 göterimi bu ýurda degişli bolupdyr. ABŞ 8,7 göterim bilen ikinji, Braziliýa 7,6 göterim bilen üçünji ýeri eýeläpdir.
Milana Gurbanaliýewa, Türkmen döwlet maliýe institutynyň talyby
