NASA-nyň astronomlary Gün ulgamynyň golaýyndaky bir ýyldyzyň golaýynda Ýere meňzeş iki sany planetanyň üstüni açdylar. NASA-nyň TESS atly emeli hemrasyndan peýdalanylyp tapylan planetalaryň 33 ýagtylyk ýyly uzaklykda ýerleşýändigi mälim edildi. NASA uzakdaky planetalary açyş institutynyň bilermeni Pet Brennan planetalaryň temperaturasynyň ony öwrenmäge päsgel berýändigini, Jeýms Webb kosmos teleskopynyň uzakdaky planetalary öwrenmekde esasy rol oýnajakdygyny aýdýar.
Täze açylan planetalaryň birine “HD 260655 b” diýlip at berildi. Ol Ýerden 1,2 esse uly. “HD 260655 c” atly beýleki planeta Ýerden 1,5 esse uly. Olaryň ikisi hem “HD 260655” ýyldyzynyň orbitasynda aýlanýar.
Planetalaryň biriniň temperaturasynyň 435, beýlekisiniň 283 derejedigi çaklanylýar.
NASA-nyň internet saýtyndaky maglumata görä, häzire çenli 5 müň 44 planetanyň üstüniň açylandygy mälim edilýär.
Üsti açylan uzak planetalaryň 30 göterimi gazlardan emele gelýär. Ýupiter we Saturn hem gazdan emele gelen planetalaryň hataryna girýär.
Handöwletow Işanmuhammet, S.A.Nyýazow adyndaky Türkmen oba hojalyk uniwersitetiniň mugallymy, Fizika-matematika ylymlarynyň kandidaty, dosent
