3×3 basketboly boýunça Aziýa çempionatyna gatnaşýan Türkmenistanyň zenanlar ýygyndysy 3 duşuşygynda-da ýeňiş gazandy. Deslapky tapgyryň oýunlarynda ildeşlerimiz Guamyň ýygyndysyny 21:14 hasabynda ýeňlişe sezewar etdi. 2-nji duşuşykda Gazagystanyň ýygyndysyny 21:10 hasabynda ýeňen ildeşlerimiziň 3-nji garşydaşy Papua-Täze Gwineýanyň zenanlar topary boldy. Bu duşuşykda-da erjel oýun görkezen türkmenistanly basketbolçylar 21:11 hasabynda ýeňşini baýram etdi. Şeýlelikde, ildeşlerimiz 3 duşuşykda 63 utuk gazanmagy başardy. Singapurda dowam edýän çempionatda zenan ýygyndymyz ýaryşyň final tapgyryna çykmagy başardy. Aziýanyň reýtinginde 12-nji ýerde barýan Türkmenistanyň ýygyndysy “D” toparçada çykyş eder. Ildeşlerimiz bu toparçada yklymyň reýtinginde 5-nji ýerde bolan Hytaý Taýpeýiniň hem-de 14-nji orundaky Şri Lankanyň ýygyndylary bilen güýç synanyşar. Duşuşyklar 8-nji iýulda oýnalar. Toparçada 1-2-nji orny eýelänler çärýek finala çykar.
Şeýle-de, erkekleriň arasyndaky duşuşyklarda şu gün türkmen basketbolçylary ilki Palestinanyň, soňra Hindistanyň ýygyndylary bilen duşuşarlar.
