Häzirki wagtda ýüz tanamak ulgamy wideo analitikasynda, giriş tertibinde, jisimi goramakda, bilim we gözleg maksatly birnäçe ulgamlaryň kompýuter tehnologiýalarynda işjeň ulanylýar. Şeýle-de bolsa, bar bolan tehnologiýalaryň köpüsinde aşa meňzeş adamlary ýa-da ekizleri kesgitlemekde ýalňyşlyklar ýüze çykyp bilýär. Russiýanyň Perm politehniki uniwersitetiniň hünärmenleri diňe bir ekizleri däl, eýsem, dürli ýaşdaky adamy tanap bilýän matematiki usuly oýlap tapdylar. Täze tehnologiýa barada Işewürlik we senagat üçin maglumatlar analitikasy boýunça halkara konferensiýada (ICDABI) habar berildi.
Habar berlişi ýaly, «Google» korporasiýasy adam ýüzlerini dogry we aýdyň tanamak meselesini çözmek maksady bilen, iki milliard dollardan gowrak serişde sarp etdi. Hünärmenleriň pikiriçe, ýüz tanamak maglumatlar bazasyndan ýa-da wideo akymyndan barlanylýar. Suratlar “süzgüçden” geçirilip, reňkleri deňeşdirilip, awtomatik ýagdaýda düzedilýär. Bu tehnologiýa adamyň gaşynyň gorizontal ýagdaýyny tapýar.
Täze tehnologiýa synagdan geçirilende, adamyň jynsy, ýaşy we beýleki tapawutlylyklary göz öňünde tutulypdyr. Perm politehniki uniwersitetiniň awtomatlaşdyryş we telemehanika kafedrasynyň dosenti, tehniki ylymlaryň kandidaty Ýuriý Lipin bu programmada ýüz keşpleri has köp ýa-da az derejede tapawutlanýan ekizleriň dürli ýaşaýyş şertlerine görä seljermegiň göz öňünde tutulýandygyny belleýär.
Synagyň dowamynda ýüz tanamak ulgamy onlarça adamdan ybarat maglumatlar bazasyndaky keşpleriň 99 göterimini tanamagyň hötdesinden geldi. Hasaplanan wektorlar bilen suratdaky ýüzi tanamagyň wagty 2 minut/sekunda deň boldy. Netijede, ýüz tanamak meselesini çözmekde diňe bir ekizleri däl, dürli ýaşdaky adamlary kesgitlemek meselesinde algoritmiň başarnygyny tassyklamaga mümkinçilik berýär.
Bilermenler bu ulgamyň geljekde dürli barlaglar üçin şahsyýetleriň ýüzlerini aýdyň we gysga wagtyň dowamynda tanamagyň has ösen usullaryny işläp taýýarlamaga täzeçe çemeleşmäge ýardam etjekdigini aýdýarlar.
Hurma HALLYÝEWA,
Ahal welaýatynyň Sarahs etrap kazyýetiniň kazysynyň kömekçisi, üçünji derejeli ýurist.
