Angliýada geçirilýän UEFA Zenanlar Ýewropa çempionatynda finala çykan ýygyndylar belli boldy. Ýarym finalda Şwesiýany 4-0 hasabynda ýeňen iňlisler 3-nji gezek final duşuşygyny oýnarlar. Angliýaly zenanlary finala çykaran gollary Mid (34), Bronz (48), Russo (68) Kirbi (76) geçirdi. Çärýek finalda Ispaniýany goşmaça wagtda 2-1 ýeňen Angliýanyň ýygyndysy mundan ilkinji bäsleşikde, 1984-nji ýylda Şwesiýa bilen duşuşypdy. Iňlisler şonda 1-nji oýunda 1-0 ýeňlipdi. Öz meýdançasynda 1-0 ýeňen Angliýanyň ýygyndysy penaltileriň netijesinde asgyn gelipdi. Olaryň 2-nji finaly 2009-njy ýylda hasaba alnyp, Finlýandiýada geçen ýaryşyň finalynda Germaniýadan 6-2 hasabynda utulypdylar.
8 gezek çempion bolan Germaniýa 9-njy sapar finalda
Angliýanyň finaldaky garşydaşy bu ýaryşyň ägirdi, yklymyň iň ökdesi Germaniýanyň ýygyndysy boldy. Nemesler ýarym finalda Fransiýanyň ýygyndysyny 2-1 hasabynda ýeňlişe sezewar etdi. Germaniýanyň ýygyndysyna ýeňiş getiren gollaryň ikisini hem Aleksandra Popp derwezä girizdi (40, 76). Fransuzlaryň ýeke-täk goluny 44-nji minutda germaniýaly Merl Froms ýalňyşlyk bilen öz derwezesinden geçirdi. Germaniýanyň ýygyndysy çärýek finalda Awstriýanyň ýygyndysyny 2-0 hasabynda ýeňipdi. Germaniýanyň ýygyndysy mundan öň 8 gezek finala çykyp, şolaryň ählisinde-de garşydaşlaryny ýeňlişe sezewar edipdi. Başgaça aýdylanda, Germaniýanyň ýygyndysy 13-nji gezek geçirilýän ýaryşda 8 sapar çempionlyk gazanypdy.
Finala çenli 5 duşuşyk geçirip, 5-sinde ýeňiş gazanan Angliýa bilen Germaniýanyň ýygyndylarynyň arasyndaky final duşuşygy 31-nji iýulda oýnalar. Londondaky “Wembley” stadionynda oýnaljak final Aşgabat wagty bilen 21:00-da başlar.
