22-nji sentýabrda britan ýazyjy zenany, iki gezek “Buker” baýragynyň eýesi Hilari Mantel 70 ýaşynyň içinde aradan çykdy. Bu baradaky maglumat ýazyjynyň kitaplarynyň neşir edilen “4th Estate” neşirýatynyň web sahypasynda peýda boldy. Eserleri köp satylan Hilari Mantel häzirki zaman iňlis ýazyjylarynyň biri bolup, häzirki zaman nusgawy eserleri bilen giň meşhurlyga eýe boldy.
Ýazyjy zenan Angliýanyň döwlet işgäri, Genrih VIII birinji geňeşçisi Tomas Kromwell (1485-1540) baradaky taryhy romanlary üçin edebiýat boýunça iň abraýly baýraklaryň biri bolan “Buker” baýragyna iki gezek mynasyp boldy. 2009-njy ýylda “Möjek zaly” (Wolf Hall), romany üçin, 2012-nji ýylda bolsa, “Jisimi salyň” (Bring Up the Bodies) romany üçin bu baýraga mynasyp görüldi. 2020-nji ýylda “Aýna we ýagtylyk” (The Mirror & The Light) atly eseri “Buker”-iň uzyn sanawyna girizildi.
Iň soňky romany 2020-nji ýylda neşir edilen ýazyjynyň Tomas Kromwell baradaky trilogiýasynyň ählisi dünýäniň onlarça diline terjime edildi. Eserleriniň umumy goýberilişi 5 million nusgadan geçdi. Edebiýata goşan goşandy üçin ýazyjy zenan Britan imperiýasynyň zenan serkerdesi diýen ordene eýe boldy.
2019-njy ýyla çenli Hilari Mantel dünýäde iki gezek “Buker” baýragyny alan ýeke-täk zenan ýazyjydy. Üç ýyl ozal bu baýragy britaniýaly terjimeçi Bernardine Ewaristo bilen paýlaşan kanadaly Margaret Etwud (ondan öň 2000-nji ýylda bu baýragy aldy) hem oňa goşuldy.
