Dünýäniň iň uly iki sport çäresiniň biri bolan futbol boýunça Dünýä Kubogynyň (beýlekisi tomusky Olimpiýa oýunlary) başlamagyna 20 günden gowrak wagt galdy. Katarda geçiriljek 22-nji Dünýä Kubogy mynasybetli biz hem çempionat bilen baglanyşykly gyzykly maglumatlary, rekordlary, täsin hasabatlary siziň dykgatyňyza yzygiderli ýetirip durmagy makul bildik.
445 futbolçynyň 94-si braziliýaly futbolçylar
Häzirki wagtda 1904-nji ýylda esaslandyrylan FIFA-nyň 211 milli federasiýa agzasy bar. Şolaryň 79-sy (Katar bilen 80 bolýar) Dünýä Kubogyna gatnaşdy. 1930-njy ýyldan bäri geçirilip gelinýän Dünýä Kubogynda bary-ýogy 8 ýygynda çempionlyk gazanmak başartdy. Şol bir ýurtlaryň gaýtalanýan çempionlyklary bilen tapawutlanýan Dünýä Kubogyna toparlar irki ýyllarda 22, 1998-nji ýyldan bäri-de 23 futbolçy bilen gatnaşýar. Çempion bolan şol 8 ýygynda seredenimizde, müňlerçe futbolçynyň gatnaşan çempionatynda bary-ýogy 445 futbolçy Dünýä Kubogyny asmana göterdi. Ýagny 445 futbolçy Dünýäniň çempiony diýen ady eýeledi. Olaryň 94-si braziliýaly, 89-sy germaniýaly, 85-si italiýaly, 45-si fransiýaly, 44-si urugwaýly, 43-si argentinaly, 23-si ispaniýaly hem-de 22-si angliýaly futbolçylardyr.
