“Bundesliganyň” çempiony we häzirki wagtda-da sanawyň lideri “Bawariýa” topary düzümini ýyldyz oýunçy bilen güýçlendirdi. Çempionatda soňky 3 tapgyry 1-1 deňlikde tamamlanan münhenliler “Mançester Sitiniň” portugaliýaly ýyldyzy, sag-çep gyraky goragçysy Žoao Kanselony transfer etdi. 28 ýaşyndaky oýunçy täze klubunda möwsümiň ahyryna çenli kärendesine oýnar. “Bawariýa” Kanselony ymykly transfer etmek islese, onda tomusda 70 million ýewrony iňlis klubuna bermeli bolar. Kanselo täze klubunda 22-nji belgili köýnekçede çykyş eder. “Benfikanyň” futbol akademiýasynda kemala gelen Kanselo, Ispaniýanyň “Walensiýa”, Italiýanyň “Inter”, “Ýuwentus” klublarynda-da oýnady. Ol 2019-njy ýylda “Mançester Sitiniň” düzümine goşulypdy. Dünýä Kubogyna çenli Pep Guardiolanyň iň esasy bil baglaýan oýunçylarynyň biri bolan Kanselonyň “Bawariýa” geçmegi köplerini azda-kände geň galdyrdy. Şikes alan Mazrauiniň ornuna transfer edilen Kanselo tälimçisi Guardiola tarapyndan soňky oýunlarda ätiýaçda oturdylypdy. Pep onuň deregine ýaş futbolçy Riko Lewis oýnadyp başlapdy. Ätiýaçda oturdylmakdan nägile bolan Kanselo hem Guardiola bilen türgenleşikde kiçeňräk sene-mene etdi. Netijede, Kanselo özüniň klub üçin gerek däldigine ynanyp, başga kluba geçenini kem görmedi. Şol klub hem “Bawariýa” boldy.
