Häzirki döwrüň tanymal ökde tälimçileri ýaşlykdan bu işe baş goşandyklary bilen meşhurlyga eýedir. Ýaş hasaplanýan ýaşlarda eginlerine sport eşiklerini geýen Žoze Mourinio, Andre Willaş-Boaş, Diego Simeone, Zinedin Zidan, Ýosep Guardiola, Ýurgen Klopp, Frank Riýkaard, Antonio Konte… ýaly özüni tanadan hünärmenler 33-3
6 ýaşlarynda tälimçi bolupdylar. Birem 30 ýaşa ýetmänkä tälimçi bolanlar hem bar bolup, olaryň iň meşhur germaniýaly Ýulian Nagelsmanndyr. 29 ýaşynda “Hoffenhaým” toparyna tälim berip başlan Nagelsmann gysga wagtda özüni görkezip, “RB Leipsigiň” tälimçisi bolýar. Onuň bu iki klubda görkezen başarnygy ony nemes futbolynyň lokomotiwi “Bawariýanyň” baş tälimçiligine çenli eltýär. Edil Nagelsmann ýaly tanalmaýan hem bolsa (häzirlikçe) ýene biri 30 ýaşyndan öň tälimçilige gadam basyp, ol şu günlerde köpleriň ünsüni özüne çekmegi başardy. William Still atly bu ýaş hünärmene futbolçylyk ýyllarynda 4-nji ligadan ýokary galmak başartmady. Ýöne muňa garamazdan, futbol baradaky maglumatlaryny, tälimçilik ukybyny dünýä belli “Football Manager” hem-de “Championship Manager” strategik kompýuter oýunlary bilen baýlaşdyryp, 17 ýaşynda tälimçi bolmagy ýüregine düwýär.
Fransiýanyň çempionaty “Ligue 1” PSŽ we beýlekiler diýlip iki topara bölünýär. 2012-nji ýylda katarly işewürler tarapyndan satyn alnan PSŽ arasynda käwagt büdräýmese şondan bäri çempionatyň ýeke-täk hojaýyny. Messi, Neýmar, Mbappe ýaly super ýyldyzlary özünde jemleýän PSŽ-niň esasy keşpde çykyş edýän çempionatynda kömekçi keşpleriň birini ýerine ýetirýän klublaryň arasynda “Reýms” topary hem bar. Ine, şol toparyň tälimçisi-de William Still bolup, onuň bu wezipä bellenenine köp wagt geçmedi.
William Still 1992-nji ýylyň 14-nji oktýabrynda Belgiýanyň Bren-l’Alle şäherinde iňlis maşgalasynda dünýä inýär. Onuň futbola bolan gyzyklanmasy çagalykdan başlasa-da, höwesjeňlikden ýokary bolmady, ýagny professionallyga ýetmedi. Ýöne onuň başga ökde ugry bardy. Ol hem “Football Manager” we “Championship Manager” kompýuter oýunlarydy. 17 ýaşyna ýetende-de, tälimçiligini hyýaly atmosferadan hakyky dünýäde dowam etdirmegi ýüregine düwýär. Angliýanyň Preston şäherinde tälimçilik kursuna gatnaýar. Şol şäheriň meşhur klublaryndan “Preston Nort End” toparynyň U-14 düzüminde tälimçiniň kömekçisi bolup tälimçilik dünýäsine ilkinji ädimini ädýär. 2014-nji ýylda Belgiýanyň “Sint Truiden” klubunyň wideo analizçisi bolýar. Ol ýazgyda tomaşa eden futbol oýunlaryndaky analizleri bilen tälimçi Ýannik Ferreranyň hem alkyşyny alýar. Still özüniň analizleri bilen “Sint-Truiden” toparynyň ýokary liga çykmagynda uly rol oýnaýar. Bu işini “Standard Liežde”, 2017-nji ýylda-da “Liers” toparynda dowam etdirýär. Ol 2017-nji ýylda 18-nji oktýabr-2-nji dekabr aralygynda “Liers” toparynyň wagtlaýynça tälimçisi bolýar. Still şol 8 hepdede 8 duşuşygyň 7-sinde ýeňiş gazanmagy başarýar. Onuň 2-nji tälimçilik synagy-da Belgiýanyň “Beershot” toparynda bolup, ol ilki 3 ýyllap tälimçiniň kömekçisi bolup işleýär. 2021-nji ýylyň ýanwarynda-da “Beershot” toparynyň baş tälimçiligine bellenýär. 6 aýlap dowam eden bu 2-nji baş tälimçilik döwründe 15 oýunda 6 ýeňiş gazanýar. 2 oýunda deňme-deň oýnap, 7 duşuşykda-da asgyn gelýär. Möwsümiň ahyrynda-da klub aşaky liga düşýär we Still hem wezipesini taşlaýar.
2022-nji ýylyň iýul aýynda William Stilliň durmuşynda täze sahypa açylýar. Ol “Ligue 1”-iň wekillerinden “Stad de Reýms” klubunda tälimçi Oskar Garsiýanyň kömekçisi wezipesine bellenilýär. Ýöne Garsiýanyň tälimçiligindäki kluba möwsüme şowly başlap bilmeýär. 10-njy tapgyrdan soň Oskar Garsiýa wezipesinden boşadylýar. Garsiýa 10 oýunda 1 gezek ýeňiş gazanyp, 4 duşuşykda-da ýeňlişe sezewar bolýar (5 deňme-deňlik). Klubuň ýolbaşçylary tälimçiligi William Stille tabşyrýarlar.
1910-njy ýylda “Societe sportive du Parc Pommery” ady bilen düýbi tutulan klub 1931-nji ýylda “Stad de Reýms” adyny alyp, täzeden esaslandyrylýar. Klubuň taryhynda 6 çempionlyk bolup, 2 gezek hem kubok ýaryşynda ýeňiş gazanýar. Ilkinji çempionlygyny 1948/49, soňky çempionlygyny-da 1961/62 möwsüminde gazanan toparyň taryhynda UEFA-nyň 1-nji derejeli klub ýaryşynda, ýagny häzirki Çempionlar Ligasynda 2 final duşuşygy hem bar. 1956-njy we 1959-njy ýyllarda finallaryň ikisinde-de “Real Madridden” ýeňlen “Reýms” topary 2000-nji ýyldan soň 3-nji liga çenli düşýär. Soňky 5 ýyldan bäri “Ligue 1”-de çykyş edip gelýän “Reýms” möwsümi ortatap ýagdaýda tamamlaýar. 2019/20 möwsümini 6-njy orunda tamamlap, Ýewropa Ligasynyň saýlama tapgyryna gatnaşýar.
“Reýms” topary William Stilliň tälimçiliginde 12 tapgyrda ýeke gezek hem ýeňilmeýär. Şol duşuşyklaryň biri-de PSŽ bilen geçirilen oýundy. Bu oýunda “Reýms” topary myhmançylykda Falorin Balogunyň 90+6-njy minutdaky goly bilen ýeňlişden halas bolup, Parižden 1 utuk bilen dolanypdy. 12 oýunda 5 gezek ýeňiş gazanyp, 7 duşuşykda-da deňme-deň oýnaýar. Klub 10-njy orna çenli beýgelýär. “Reýms” topary ýaş tälimçisiniň ýolbaşçylygynda geçiren 14 duşuşygynda ýeke gezek hem utulmaýar. 30 ýaşyndaky tälimçiniň klubdaky iň esasy bil baglaýan ýyldyzy Falorin Balogun bolup, ol toparynyň “Loriýan” bilen geçiren duşuşygynda het-trik edýär. Balogun 14 gol geçirip, Mbappe, Messi, Neýmar, Ben Ýedder ýaly ýyldyzlardan öňe saýlanyp, iň köp gol geçirenleriň sanawynyň başyny çekýär. Häzirki wagtda Ýewropanyň öňdebaryjy 5 çempionatyndaky iň ýaş tälimçi bolan William Stilliň bu şowly çykyşynyň dowam edip, ony has ulurak klublarda-da görmek hiç kimi geň galdyrmaz.
