Angliýanyň Liga Kubogyna (EFL Cup) “Mançester Ýunaýted” mynasyp boldy. Mankunianlar Londondaky “Wembley” stadionynda oýnalan finalda “Nýukasl” topary bilen duşuşdy. Duşuşyga 87 müň 306 janköýer tomaşa etdi. Çekeleşikli geçen oýunda “Mançester Ýunaýted” 2-0 hasabynda ýeňiş gazandy. “Ýunaýtede” ýeňiş gazandyran gollary 33-nji minutda Kazemiro bilen 39-njy minutda Markus Reşford derwezä girizdi. Şunlukda, “Mançester Ýunaýted” 1992-nji, 2006-njy, 2009-njy, 2010-njy we 2017-nji ýyllardan soň 6-njy gezek Liga Kubogy eýeledi. “Mançester Ýunaýted” bu ugurda “Liwerpul” (9) hem-de “Mançester Sitiden” (8) soň 3-nji orunda barýar. Toparyň tälimçisi Erik Ten Hag “Ýunaýteddäki” 1-nji, karýerasyndaky 7-nji kubogyny gazandy. Bu olaryň 5 ýyl 278 günden soň gazanan ilkinji kubogy bolup, soňky 40 ýylda kuboksyz geçen şeýle uly arakesme bolmandy. “Mançester Ýunaýted” soňky gezek 2017-nji ýylda Liga Kubogyny hem-de Ýewropa Ligasynyň Kubogyny gazanypdy.
“Nýukasl” topary-da 1976-njy ýyldan soň 2-nji gezek finalda utulyp, ýene bir ýola kubogy eýeläp bilmedi.
