Dünýä futbolynyň ägirtlerinden, fransiýaly meşhur futbolçy Žýust Fonten Tuluza şäherinde 89 ýaşynda aradan çykdy. 1933-nji ýylyň 18-nji awgustynda Marokkonyň Marrakeş şäherinde dünýä inen Fonten professional futbola Kasablanka toparynda başlaýar. 1953-nji ýyla çenli bu klubda oýnan Fonten Nissa hem-de “Reýms” klublarynyň köýnekçelerini geýýär. Ol “Nissa” toparynda 3, “Reýms” klubunda-da 6 möwsüm çykyş edýär. Klublarda 284 oýunda 258 gol geçirýär. Žýust Fonten 1958-nji ýylda Şwesiýada geçirilen Dünýä Kubogynda uly meşhurlyk gazanýar. Ol bu çempionatda 6 duşuşykda 13 gol geçirýär. Başgaça aýdylanda, ol bir Dünýä Kubogy ýaryşynda iň köp gol geçiren futbolçy bolup, onuň bu rekordyna entek-entekler golaýlan futbolçy ýok. Fonten şol çempionatda 2 gezek het-trik edip, Paragwaýyň derwezesinden 3, 3-nji ýer üçin duşuşykda-da Günbatar Germaniýanyň torundan 4 gol geçirýär. Ol toparçada Ýugoslawiýanyň hem-de çärýek finalda Demirgazyk Irlandiýanyň derwezelerine-de 2 gol girizýär. Umumylykda, Fonten Fransiýanyň milli ýygyndysynda 21 oýunda 30 gol geçirýär. Fonten Fransiýanyň çempionatynda “Nissa” bilen 1, “Reýms” bilenem 3 gezek çempionlyk gazanýar. Her klub bilenem 1 gezek Fransiýanyň kubogyny gazanýar. Dünýä Kubogynda bürünç medal hem gazanan Fonten 1958/59 möwsüminde Ýewropanyň Çempion Klublarynyň Kubogy (häzirki Çempionlar Ligasy) ýaryşynda iň netijeli futbolçy bolýar. Şol möwsümde “Reýms” finalda “Real Madridden” asgyn gelýär. 12 ýyllyk professional karýerasyndan soň tälimçilige başlan Fonten 2 oýunlyk Fransiýanyň ýygyndysyna, “Luçon” (1968 – 69), PSŽ (1973 – 76), “Tuluza (1978–79) klublaryna, şeýle-de Marokkonyň ýygyndysyna (1979–81) tälim berýär. Ol Fransiýanyň birnäçe abraýly döwlet nyşanlarynyň, ordenleriniň hem eýesidir.
